ന്യൂദല്ഹി: ആണവ വിതരണ ഗ്രൂപ്പ്(എന്എസ്ജി) അംഗത്വത്തിനുള്ള ഭാരതത്തിന്റെ ശ്രമങ്ങള്ക്ക് ന്യൂസിലാന്ഡിന്റെ പിന്തുണ. ഒരു രാജ്യത്തിന് മാത്രമായി അനുമതി നിഷേധിക്കരുതെന്ന് ഇക്കാര്യത്തില് നടത്തിയ പ്രതികരണത്തില് ന്യൂസിലാന്ഡ് വ്യക്തമാക്കി.
ഭാരതത്തിന്റെ എന്എസ്ജി അംഗത്വം അംഗീകരിക്കണമെന്നാവശ്യപ്പെട്ട് അമേരിക്കന് ആഭ്യന്തര സെക്രട്ടറി ജോണ് കെറി എന്എസ്ജി അംഗരാഷ്ട്രങ്ങള്ക്ക് കത്തയച്ചിരുന്നു. ഇതിനുള്ള മറുപടിയിലാണ് തങ്ങളുടെ മുന് നിലപാട് ഉപേക്ഷിച്ച് ഭാരതത്തിനുള്ള പിന്തുണ ന്യൂസിലാന്ഡ് അറിയിച്ചത്.
എന്നാല് എന്എസ്ജി അംഗത്വത്തിന് ഭാരതത്തിന് ഇനിയും പിന്തുണ നല്കാത്ത രാഷ്ട്രങ്ങള് തുര്ക്കി, ആസ്ത്രിയ, അയര്ലാന്റ്, ദക്ഷിണാഫ്രിക്ക, ചൈന എന്നിവയാണ്. ഇതില് തുര്ക്കി, പാക്കിസ്ഥാനും ഭാരതത്തിനും ഒരുമിച്ചു അംഗത്വം നല്കിയാല് മാത്രം പിന്തുണയ്ക്കാമെന്ന നിലപാടിലാണ്. ചൈനയും എതിര്പ്പ് ശക്തമാക്കിയിരിക്കുകയാണ്. ഭാരതത്തിന് നല്കിയാല് പാക്കിസ്ഥാനും നല്കണമെന്നതാണ് ചൈനയുടേയും നിലപാട്.
എന്എസ്ജിയില് 48 അംഗരാജ്യങ്ങളാണുള്ളത്. ഇതില് ബഹുഭൂരിപക്ഷം രാജ്യങ്ങളുടേയും പിന്തുണ ഇതിനകം ലഭ്യമായതിനാല് ജൂണ് 20ന് സിയോളില് നടക്കുന്ന എന്എസ്ജി അംഗരാജ്യങ്ങളുടെ പ്ലീനറി യോഗത്തില് ഭാരതത്തിന്റെ അംഗത്വം ഉറപ്പാകുമെന്നാണ് പ്രതീക്ഷിക്കപ്പെടുന്നത്. വിയന്നയില് കഴിഞ്ഞയാഴ്ച നടന്ന യോഗത്തില് സമവായം ഉണ്ടായിരുന്നില്ല.
ഭാരതത്തിന്റെ എന്എസ്ജി പ്രവേശനം തടയണമെന്ന ആവശ്യവുമായി തുര്ക്കി, ആസ്ത്രിയ വിദേശകാര്യ മന്ത്രിമാരുമായി പാക് വിദേശകാര്യ ഉപദേഷ്ടാവ് സര്താസ് അസീസ് സമീപിച്ചിട്ടുണ്ട്. എന്നാല് ഭാരതം എന്എസ്ജി അംഗത്വത്തിലേക്ക് അതിവേഗം അടുക്കുകയാണെന്ന് ചൈനീസ് ഔദ്യോഗിക മാധ്യമം റിപ്പോര്ട്ട് ചെയ്തു.
ഭാരതത്തിന് അംഗത്വം ലഭിച്ചു കഴിഞ്ഞാല് അന്താരാഷ്ട്ര വിപണിയില് നിന്നും സിവിലിയന് ന്യൂക്ലിയന് സാങ്കേതിക വിദ്യ കൂടുതല് വേഗത്തില് ലഭ്യമാകുമെന്നും ആഭ്യന്തര ആണവ സംവിധാനങ്ങള് സൈനികാവശ്യങ്ങള്ക്ക് ഉപയോഗിക്കാനാകുമെന്നും പീപ്പിള്സ് ഡെയ്ലി റിപ്പോര്ട്ടില് പറയുന്നു. എന്എസ്ജി അംഗത്വത്തോടെ ഭാരതത്തിന്റെയും പാക്കിസ്ഥാന്റെയും ആണവ സന്തുലനം തകരുമെന്നും ഭാരതം കൂടുതല് ശക്തിയാര്ജ്ജിക്കുമെന്നും റിപ്പോര്ട്ടിലുണ്ട്.
