മട്ടാഞ്ചേരി: പശ്ചിമകൊച്ചി പകര്ച്ച പനിയുടെ പിടിയില്. വൈറല് ഫീവര്, അഞ്ചാംപനി, ഡെങ്കിപ്പനി, എലിപ്പനി തുടങ്ങി വിവിധ പേരിലുള്ള പനിയാണ് പടരുന്നത്. മലിനമായ കുടിവെള്ളം, മാലിന്യങ്ങള്, പരിസര ശുചീകരണമില്ലായ്മ തുടങ്ങി വിവിധ പ്രശ്നങ്ങളാണ് പനി പകര്ച്ചയ്ക്ക് കാരണമെന്ന് ഡോക്ടര്മാര് പറയുന്നു. കടുത്ത വേനലിലെ ശുദ്ധജല ലഭ്യത കുറവും മഴക്കാലത്തെ ശുചീകരണ പോരായ്മയും പകര്ച്ചവ്യാധികള് വ്യാപിക്കാനിടയാക്കി.ആരോഗ്യവകുപ്പ് അധികൃതര് പനിബാധിത പ്രദേശങ്ങള് സന്ദര്ശിച്ച് ബോധവത്ക്കരണം നടത്തുന്നുണ്ടെങ്കിലും ഇതെല്ലാം പാഴാകുന്ന പ്രവര്ത്തനമായാണ് മാറുന്നത്.
പശ്ചിമകൊച്ചിയുടെ വിവിധ ഭാഗങ്ങളില് മഞ്ഞപ്പിത്തവും ചിക്കന്പോക്സ് തുടങ്ങിയ രോഗങ്ങളും റിപ്പോര്ട്ട് ചെയ്തിരുന്നു. മരുന്നുകളുടെ ദൗര്ലഭ്യങ്ങള്ക്കൊപ്പം സര്ക്കാര്, സ്വകാര്യ ആശുപത്രികളിലെ രോഗ നിര്ണ്ണയ പോരായ്മകളും വിദഗ്ധ ചികിത്സയ്ക്ക് തടസം സൃഷ്ടിച്ചിരുന്നു.
മഴക്കാല പൂര്വ്വ രോഗ, പ്രതിരോധ പ്രവര്ത്തനങ്ങള് തുടങ്ങുന്നതോടോപ്പം കൊതുകുനിവാരണം മാലിന്യ നീക്കം, കുടിവെള്ള ലഭ്യത എന്നിവയിലും പരിഹാര നടപടികള് കൈക്കൊള്ളണമെന്നും ജനങ്ങള് ആവശ്യപ്പെടുന്നു.
