മുംബൈ: ഇന്ത്യന് ക്രിക്കറ്റ് ടീമിന്റെ ഏകദിന, ട്വന്റി20 നായക സ്ഥാനത്തു നിന്ന് എം.എസ്. ധോണി ഒഴിയേണ്ട സമയമായെന്ന് ടീമിന്റെ മുന് ടെക്നിക്കല് ഡയറക്റ്റര് രവി ശാസ്ത്രി. ഇപ്പോള് ടെസ്റ്റ് നായകനായ വിരാടിനെ ഏകദിന, ട്വന്റി20യിലും ചുമതലയേല്പ്പിക്കണമെന്നും ശാസ്ത്രി നിര്ദേശിച്ചു.
ഇതാണ് അനുയോജ്യമായ സമയം. സമീപഭാവിയില് കൂടുതല് ടെസ്റ്റ് മത്സരങ്ങളാണ് ഇന്ത്യ കളിക്കുക. ദീര്ഘനാള് കളത്തില് നിന്ന് മാറിനില്ക്കേണ്ടി വരുന്നത് ധോണിയെ ബാധിക്കും. ഈ ഇടവേള പ്രശ്നം സൃഷ്ടിക്കും.
ധോണി മികച്ച നായകനെങ്കിലും ഇതെങ്ങനെ ഉള്ക്കൊള്ളാനാകുമെന്നത് പ്രധാനം. അടുത്ത മൂന്നു വര്ഷം ലോകകപ്പ് പോലുള്ള വലിയ ടൂര്ണമെന്റുകളൊന്നുമില്ല. പുതിയ നായകനെ ചുമതലയേല്പ്പിക്കാന് പറ്റിയ സമയമിതാണ്- ശാസ്ത്രി പറഞ്ഞു. കടുത്ത തീരുമാനമാകുമെങ്കിലും, ഒഴിവാക്കാനാകില്ലെന്നും ശാസ്ത്രി.
2014 ഓഗസ്റ്റ് മുതല് 2016 ലോക ട്വന്റി20 ചാമ്പ്യന്ഷിപ്പ് വരെ രവി ശാസ്ത്രി ഇന്ത്യന് ടീമിന്റെ ടെക്നിക്കല് ഡയറക്റ്റായി ചുമതല വഹിച്ചിരുന്നു.
വിരാടിനെ പിന്തുണച്ച് ഓഫ് സ്പിന്നര് ആര്. അശ്വിനും രംഗത്ത്. വിരാട് സമ്പൂര്ണ നായകനാണ്. മത്സരത്തിനു മുന്പ് കൃത്യമായി ഗൃഹപാഠം ചെയ്യും, നിരവധി തവണ ടീം മീറ്റിങ് ചേരും. അത് ഏറെ ആത്മവിശ്വാസം നല്കും.
കളത്തില് എന്റെ അഭിപ്രായങ്ങള് വിരാട് ശ്രദ്ധിക്കും. പന്തെറിയുമ്പോള് ഫീല്ഡ് വിന്യാസത്തിനും അനുമതി നല്കും- അശ്വിന് പറഞ്ഞു.
