നാഷണല് ഹാര്ബര്: ടെക്സാസിലെ ഓസ്റ്റിനില് നിന്നുളള അഞ്ചാം ക്ലാസുകാരന് നിഹാര് ജങ്കയും ന്യൂയോര്ക്കിലെ പെയിന്റഡ് പോസ്റ്റില് നിന്നുളള ഏഴാം ക്ലാസുകാരന് ജയറാം ഹാത്വറും ഇക്കൊല്ലത്തെ യുഎസ് സ്ക്രിപ്സ് നാഷണല് സ്പെല്ലിംഗ് ബീ മത്സരത്തില് ഒന്നാം സ്ഥാനം പങ്കിട്ടു. ഫൈനലില് ഇവര് 25 തവണ പരസ്പരം ഏറ്റുമുട്ടി.
ഭാരത വംശജരാണ് രണ്ടു വിജയികളും. തുടര്ച്ചയായി ഇതു നാലാം തവണയാണ് ഭാരത വംശജര് വിജയികളാകുന്നത്.
2014ലെ മത്സരത്തില് ഒന്നാം സ്ഥാനം പങ്കുവച്ച ശ്രീറാം ഹാത് വറിന്റെ ഇളയ സഹോദരനാണ് പതിമൂന്നുകാരനായ ജയറാം. പതിനൊന്നാം വയസില് മത്സരം വിജയിച്ച നിഹാറാണ് അമേരിക്കന് സ്പെല്ലിങ് ബീ മത്സരത്തില് ഏറ്റവും ചെറിയ പ്രായത്തില് ചാമ്പ്യനാകുന്നത്. തുടര്ച്ചയായ രണ്ട് കൊല്ലം മത്സരത്തില് ടൈ വന്നതിനെ തുടര്ന്ന് ഇത്തണ മത്സരം ഏറെ കടുത്തതാക്കിയിരുന്നു.
ജയറാം രണ്ട് തവണ വാക്കുകള് തെറ്റിച്ച് ഉച്ചരിച്ചു. എന്നാല് അപ്പോഴോക്കെ നിഹാറിനും തെറ്റ് പറ്റി. ഇരുവര്ക്കും ട്രോഫിയും 45000 ഡോളറിന്റെ ക്യാഷ് അവാര്ഡും മറ്റു സമ്മാനങ്ങളും ലഭിച്ചു.
