ന്യൂദല്ഹി: പേപ്പര് ഉപയോഗിക്കാതെ ഇ ഗവേണന്സ് നടത്തുന്ന മികച്ച മന്ത്രാലയങ്ങളുടെയും വകുപ്പുകളുടെയും ഓഫീസുകള്ക്ക് പ്രധാനമന്ത്രിയുടെ പ്രത്യേക സമ്മാനം നല്കും. മികച്ച ഇ ഭരണ സംവിധാനം നടത്തുന്ന, പേപ്പര് ഉപയോഗിക്കാത്ത ഓഫീസുകള്ക്ക് പൊതുഭരണ മികവ് ദിനാഘോഷത്തില് സമ്മാനം നല്കുമെന്ന് പിഎംഒയുടെ ചുമതലയുള്ള മന്ത്രി ഡോ. ജിതേന്ദ്ര സിങ് പറഞ്ഞു.
കേന്ദ്ര മന്ത്രാലയങ്ങളിലെല്ലാം തന്നെ ഉടന് തന്നെ ഇ-ഓഫീസ് സംവിധാനം വിജയകരമായി നടപ്പാക്കും. ചെലവ് കുറയ്ക്കുകയും സര്ക്കാര് പ്രവര്ത്തനങ്ങള് കൂടുതല് കാര്യക്ഷമമാക്കുകയുമാണ് പദ്ധതിയിലൂടെ ലക്ഷ്യമിടുന്നത്. സമയബന്ധിതമായി പേപ്പര് രഹിത പ്രവര്ത്തനം നടപ്പാക്കണമെന്ന് എല്ലാ മന്ത്രാലയങ്ങള്ക്കും കത്തെഴുതുമെന്ന് ജിതേന്ദ്ര സിംഗ് എല്ലാ മന്ത്രാലയങ്ങളോടും അറിയിച്ചു. സര്ക്കാര് വളരെ പ്രാധാന്യം കൊടുക്കുന്ന ഒരു പദ്ധതിയാണിതെന്നും അദ്ദേഹം വ്യക്തമാക്കി. ഭരണ നടപടികള് വേഗത്തിലാക്കാന് ഇ-സംവിധാനം സഹായകമാകുമെന്നും പണച്ചെലവ് കുറയ്ക്കാനാകുമെന്നും അദ്ദേഹം ചൂണ്ടിക്കാട്ടി.
പൊതുഭരണത്തില് മികച്ച പ്രവര്ത്തനം കാഴ്ചവയ്ക്കുന്നവര്ക്ക് വര്ഷം തോറും പുരസ്കാരങ്ങള് നല്കുമെന്നും അദ്ദേഹം പറഞ്ഞു. സിവില് സര്വീസ് ദിനത്തില് പ്രധാനമന്ത്രി നേരിട്ടാകും പുരസ്കാരങ്ങള് സമ്മാനിക്കുക. ‘മിതമായ സര്ക്കാര്, കൂടുതല് ഭരണം’ എന്നതാണ് പുതിയ പദ്ധതിയിലൂടെ ലക്ഷ്യമിടുന്നത്. ഇതിനൊപ്പം വിശ്വാസ്യതയും സുതാര്യതയും പുതുമയും വേണമെന്നും സിംഗ് പറഞ്ഞു. പ്രധാനമന്ത്രിയുടെ ദൗത്യമായ പ്രഗതിയിലേക്ക് എത്താനുളള ശ്രമമാണിതെന്നും അദ്ദേഹം വ്യക്തമാക്കി.
