മൊഹാലി: അവസാന പന്തുവരെ ആവേശം അലയടിച്ച പോരാട്ടത്തില് ബെംഗളൂരു റോയല് ചലഞ്ചേഴ്സിന് ത്രസിപ്പിക്കുന്ന വിജയം. ഒപ്പത്തിനൊപ്പം പോരാടിയ കിങ്സ് ഇലവന് പഞ്ചാബിനെ ഒരു റണ്ണിനാണ് കോഹ്ലിയും കൂട്ടരും പരാജയപ്പെടുത്തിയത്.
അവസാന ഓവറില് കിങ്സ് ഇലവന് ജയിക്കാന് 17 റണ്സായിരുന്നു വേണ്ടിയിരുന്നത്. എന്നാല് ക്രിസ് ജോര്ദാന് എറിഞ്ഞ ഓവറില് 15 റണ്ണെടുക്കാനേ അവര്ക്ക് കഴിഞ്ഞുള്ളൂ. 57 പന്തില് നിന്ന് 12 ഫോറും ഒരു സിക്സുമടക്കം 89 റണ്സെടുത്ത ഓപ്പണര് മുരളി വിജയിന്റെയും അവസാന ഓവറുകളില് ആഞ്ഞടിച്ച മാര്ക്ക്സ് സ്റ്റോയ്നിസിന്റെയും (22 പന്തില് പുറത്താകാതെ 34) ഇന്നിങ്സുകള് പാഴായി.
ഓപ്പണര് ഹാഷിം ആംല (21), വൃദ്ധിമാന സാഹ (16) എന്നിവരും ഭേദപ്പെട്ട പ്രകടനം നടത്തി. ആദ്യം ബാറ്റ് ചെയ്ത റോയല് ചലഞ്ചേഴ്സ് ബെംഗളൂരു 20 ഓവറില് ആറ് വിക്കറ്റ് നഷ്ടത്തില് 175 റണ്സെടുത്തപ്പോള് കിങ്സ് ഇലവന് നാല് വിക്കറ്റ് നഷ്ടത്തില് 174 റണ്സെടുക്കാനേ കഴിഞ്ഞുള്ളൂ.
പരാജയത്തോടെ കിങ്സ് ഇലവന്റെ പ്ലേ ഓഫ് സാധ്യത ഏറെക്കുറെ അസ്തമിച്ചപ്പോള് റോയല്ചലഞ്ചേഴ്സ് സാധ്യത നിലനിര്ത്തി. 17-ാം ഓവറിലെ അവസാന പന്തില് മുരളി വിജയിനെ വാട്സണ് പുറത്താക്കിയതാണ് കളിയിലെ വഴിത്തിരിവ്. ആംലയെയും വിജയിനെയും പുറത്താക്കിയ വാട്സണ് മത്സരത്തിലെ താരം. കളിച്ച പത്തില് ഏഴിലും തോറ്റ കിങ്സ് ഇലവന് 6 പോയിന്റുമായി ഏറ്റവും പിന്നില്. 9 കളികളില് നിന്ന് നാല് വിജയത്തോടെ 8 പോയിന്റുള്ള റോയല് ചലഞ്ചേഴ്സ് ആറാമത്.
പതിവുപോലെ റോയല് ചലഞ്ചേഴ്സിന് മികച്ച തുടക്കമാണ് ഓപ്പണര്മാര് നല്കിയത്. ക്രിസ് ഗെയ്ല് വീണ്ടും പുറത്തിരുന്നപ്പോള് കെ.എല്. രാഹുല് വീണ്ടും കത്തിക്കയറുന്നതാണ് മെഹാലിയില് കണ്ടത്. കോഹ്ലിയെ കാഴ്ച്ചക്കാരനാക്കി രാഹുല് തകര്ത്തതോടെ സ്കോര് അതിവേഗം കുതിച്ചു. എന്നാല് എട്ടു പന്തുകള്ക്കിടെ ബാംഗ്ലൂരിന്റെ മുന്നിരയെ പഞ്ചാബ് തകര്ത്തു. 25 പന്തില് 42 റണ്സെടുത്ത രാഹുലിനെ കരിയപ്പ ബൗള്ഡാക്കിയതായിരുന്നു തുടക്കം.
സ്കോര്ബോര്ഡില് 63 റണ്സായിരുന്നു അപ്പോള്. തൊട്ടുപിന്നാലെ കോഹ്ലി (20), ഷെയ്ന് വാട്സണ് (1) എന്നിവര് മടങ്ങിയതോടെ മൂന്നിന് 67 റണ്സിലേക്ക് റോയല് ചലഞ്ചേഴ്സ് വീണു. മലയാളി താരം സച്ചിന് ബേബിയും എ.ബി. ഡിവിലിയേഴ്സും ചേര്ന്നതോടെ ബാംഗ്ലൂര് വീണ്ടു ഉയിര്ത്തെണീറ്റു. സച്ചിന് സിംഗിളുകളുമായി കളംനിറഞ്ഞപ്പോള് ഡിവില്ലിയേഴ്സ് അടിച്ചുതകര്ത്തു.
35 പന്തുകളില് നിന്ന് അഞ്ച് ഫോറും രണ്ട് സിക്സറുമടക്കം 64 റണ്സ് ഡിവില്ലിയേഴ്സ് അടിച്ചുകൂട്ടി. 29 പന്തില് നിന്ന് 33 റണ്സെടുത്ത സച്ചിന് ബേബി ഇന്നിങ്സിലെ അവസാന പന്തില് പുറത്തായി. കിങ്സ് ഇലവന് വേണ്ടി കരിയപ്പയും സന്ദീപ് ശര്മ്മയും രണ്ട് വിക്കറ്റുകള് വീഴ്ത്തി.
ഇന്ന് മുംബൈ ഇന്ത്യന്സുമായാണ് റോയല് ചലഞ്ചേഴ്സിന്റെ അടുത്ത പോരാട്ടം.
