പാലാ: കേരളം കുംഭകോണങ്ങളുടെയും അഴിമതിയുടെയും നാടായി മാറിയെന്ന് കേന്ദ്രമന്ത്രി എച്ച്.എന് അനന്തകുമാര്. എല്ഡിഎഫിന്റെയും യുഡിഎഫിന്റെയും ഭരണകാലത്ത് നടക്കുന്ന അഴിമതികള് മറച്ചു വയ്ക്കാന് രണ്ടു മുന്നണികളും കേരളത്തില് ഒത്തുതീര്പ്പ് രാഷ്ട്രീയമാണ് നടത്തുന്നതെന്നും അദ്ദേഹം പറഞ്ഞു. പാലായിലെ എന്ഡിഎ സ്ഥാനാര്ത്ഥി എന്.ഹരിയുടെ തെരഞ്ഞെടുപ്പ് പ്രചാരണത്തിന്റെ ഭാഗമായി മുത്തോലി കവലയില് നടന്ന പൊതു സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
മുഖ്യമന്ത്രി ഉമ്മന്ചാണ്ടിയുടെയും രമേശ് ചെന്നിത്തലയുടെയും കെ.എം മാണിയുടെയും മണ്ഡലങ്ങളിലൂടെ നടത്തിയ യാത്രയില് ഒരിടത്തും യുവാക്കള്ക്ക് തൊഴില് നല്കുന്ന ഒരു തൊഴില് സംരംഭവും ഇല്ല. എല്ലായിടത്തും വളരുന്നത് കുംഭകോണ വ്യവസായങ്ങള് മാത്രം. നിങ്ങള്ക്ക് അഴിമതിക്കാരായ ഉമ്മന്ചാണ്ടിയെയും കെ.എം മാണിയെയം വേണോ? എന്ന് അവിടെ തിങ്ങി നിറഞ്ഞ ജനങ്ങളോടായി അന്തകുമാര് ചോദിച്ചു. ഇവരെ വേണ്ടെങ്കില് യുഡിഎഫിനെ തൂത്തെറിയണമെന്നും അദ്ദേഹം ആവശ്യപ്പെട്ടു.തെരഞ്ഞെടുപ്പ് പ്രഖ്യാപനത്തിന് മുമ്പ് ഉമ്മന്ചാണ്ടിക്ക് ഉദ്ഘാടനങ്ങളുടെ കാലമായിരുന്നു. സിഗ്നലും വൈദ്യുതീകരണ നടപടികളും പൂര്ത്തിയാകാതെയാണ് കൊച്ചു മെട്രോ ഉദ്ഘാടനം ചെയ്തത്. കണ്ണൂര് വിമാനത്താവളം ഉദ്ഘാടനം ചെയ്തത് എയര്ട്രാഫിക് സംവിധാനങ്ങള് ഒന്നും പൂര്ത്തിയാക്കാതെ. നെടുമ്പാശ്ശേരിയില് ഇന്റര്നാഷണല് ടെര്മിനല് പൂര്ത്തിയാകാതെ ഉമ്മന്ചാണ്ടി ഉദ്ഘാടനം ചെയ്തു. ചുമ്മാതൊരു മുഖ്യമന്ത്രിയും ചുമ്മതൊരു ഉദ്ഘാടനവും നമുക്കാവശ്യമില്ല. ബംഗാളില് കോണ്ഗ്രസ്സിനും സിപിഎമ്മിനും പരസ്യബാന്ധവമാണെങ്കില് കേരളത്തില് രഹസ്യമായാണ് നടക്കുന്നത്. ലാവ്ലിന്, സോളാര്, ബാര്കോഴ അഴിമതികളില് എല്ഡിഎഫും യുഡിഎഫും പരസ്പരം സഹായിക്കുകയാണ്. അച്യുതാനന്ദനും പിണറായിയും എല്ഡിഎഫിലും ഉമ്മന്ചാണ്ടിയും ചെന്നിത്തലയും സുധിരനും യുഡിഎഫിലും നേതൃസ്ഥാനം ഉറപ്പിക്കാനുള്ള മത്സരത്തിലാണ്. തൊഴിലില്ലായ്മയും ശുദ്ധജലക്ഷാമവുമാണ് പാലായുടെ ശാപം. 50 വര്ഷം ഭരിച്ച കെ.എം മാണിക്ക് ഒരു തൊഴില് സ്ഥാപനം കൊണ്ടുവരാന് കഴിഞ്ഞില്ല. മീനച്ചിലാര് മലിനപ്പെട്ട് വറ്റിവരണ്ടു. മൂന്നാം മുന്നണിക്കേ കേരളത്തെ രക്ഷിക്കാന് കഴിയൂ എന്നും അതിന് എന്ഡിഎ അധികാരത്തില് വരണമെന്നും അനന്തകുമാര് പറഞ്ഞു. ബിജെപി സംസ്ഥാനസമിതിയംഗം പ്രൊഫ. ബി. വിജയകുമാര് മന്ത്രിയുടെ പ്രസംഗം പരിഭാഷപ്പെടുത്തി. എന്ഡിഎ പാലാ നിയോജകമണ്ഡലം ചെയര്മാന് മോഹനന് പനയ്ക്കല് അധ്യക്ഷതവഹിച്ചു. സ്ഥാനാര്ത്ഥി എന്.ഹരി, അഡ്വ. എസ്. ജയസൂര്യന്, അഡ്വ. കെ.എം സന്തോഷ്കുമാര്, വിത്സന് മാത്യു, രഞ്ജിത്.ജി, അനീഷ് പുല്ലുവേലില് എന്നിവര് പ്രസംഗിച്ചു.
