കൊല്ലം: കോണ്ഗ്രസ് നേത്വത്വം നല്കുന്ന വലതുമുന്നണി വിനാശത്തിന്റെയും സിപിഎം നേതൃത്വം നല്കുന്ന ഇടതുമുന്നണി വിദ്വേഷത്തിന്റെയും പ്രതീകമാണെന്ന് കേന്ദ്രമന്ത്രി അനന്തകുമാര് പറഞ്ഞു.
ഉമയനല്ലൂരില് സംഘടിപ്പിച്ച ഇരവിപുരം എന്ഡിഎ തെരഞ്ഞെടുപ്പ് കണ്വെന്ഷന് ഉദ്ഘാടനം ചെയ്യുകയായിരുന്നു അദ്ദേഹം.
ദൈവത്തിന്റെ സ്വന്തം നാടായ കേരളത്തില് നിന്നും ഉണ്ടാകുന്ന വാര്ത്തകള് ഞെട്ടലുളവാക്കുന്നതാണ്. ഒറീസയിലും ബീഹാറിലും ഉത്തര്പ്രദേശിലുമൊക്കെ നടക്കുന്ന ക്രൂരമായ കൊലപാതകങ്ങളും പീഡനങ്ങളും കേരളത്തിലും സംഭവിക്കുന്നു. ജിഷയുടെ മരണത്തെക്കുറിച്ച് സമഗ്രമായ അന്വേഷണം ആവശ്യമാണ്. കുറ്റവാളികളെ നിയമത്തിനു മുന്നിലെത്തിച്ച് പരമാവധി ശിക്ഷ നല്കണം. ഈ ദാരുണമരണത്തിന്റെ ഉത്തരവാദികള് ഇടതുപക്ഷവും വലതുപക്ഷവുമാണ്. ഉമ്മന്ചാണ്ടിയെ പോലെ തന്നെ വിഎസും പിണറായി വിജയനും ഇതിന് ഉത്തരം പറയേണ്ടവരാണ്. ജിഷ താമസിക്കുന്ന വാര്ഡും പഞ്ചായത്തും എംഎല്എയുമൊക്കെ ഇടതുപക്ഷത്തിന്റെ പ്രതിനിധികളാണ് ഭരിക്കുന്നത്. അവരില് നിന്നും യാതൊരുവിധത്തിലുമുള്ള സംരക്ഷണവും തങ്ങള്ക്ക് ലഭിച്ചില്ലയെന്ന ജിഷയുടെ അമ്മയുടെ വെളിപ്പെടുത്തല് കേരളത്തിന്റെ അവസ്ഥ കാട്ടിതരുന്നു. അന്വേഷണം ശരിയായ ദിശയിലല്ല നടക്കുന്നത്. കേരളത്തില് മാതൃകാ ഭരണ കര്ത്താക്കളില്ല. നിറം മാറുന്ന ഒന്തിനെപോലെയുള്ള രാഷ്ട്രീയക്കാരും ഭരണകര്ത്താക്കളും ഒരുപക്ഷത്തും മറുവശത്ത് തീരുമാനങ്ങള് എടുക്കാന് കഴിവില്ലാത്ത ഭരണകര്ത്താക്കളുമാണ്. അധികാരത്തിന് വേണ്ടി മാത്രമെത്തുന്ന ഇക്കൂട്ടരെ കേരളത്തിലെ ജനത തിരിച്ചറിഞ്ഞിട്ടുണ്ട്. ബിജെപി നേതൃത്വം നല്കുന്ന മൂന്നാം മുന്നണി കേരളം ഭരിക്കും. ഇവിടുത്തെ സാധാരണ ജനങ്ങളുടെ ഉന്നതിയും വികസനവുമായിരിക്കും ആ സര്ക്കാരിന്റെ ലക്ഷ്യമെന്നും അദ്ദേഹം പറഞ്ഞു.
ബിജെപി ജില്ലാ വൈസ് പ്രസിഡന്റ് അഡ്വ.ജി.ഗോപകുമാര് ആമുഖ പ്രഭാഷണം നടത്തി. ഇരവിപുരത്ത് മത്സരിക്കുന്നവരില് ഒരാള് കൊലയാളിയും മറ്റൊരാള് പതിനഞ്ചുവര്ഷമായി ഇരവിപുരത്തെ ജനങ്ങളെ നാശത്തിന്റെ പടുകുഴിയിലേക്ക് തള്ളിവിട്ടയാളുമാണെന്ന് അദ്ദേഹം പറഞ്ഞു. മണ്ഡലം പ്രസിഡന്റ് ശ്രീവിലാസം മനോജിന്റെ അദ്ധ്യക്ഷതയില് കൂടിയ യോഗത്തില് ബിജെപി ജില്ലാ പ്രസിഡന്റ് ജി.ഗോപിനാഥ്, ജനറല് സെക്രട്ടറി സുജിത്ത് സുകുമാരന്, ബിജെപി നേതാക്കളായ നെടുമ്പന ഓമനകുട്ടന്, സി.തമ്പി, സ്ഥാനാര്ത്ഥി ആക്കാവിള സതീക്ക്, ബിഡിജെഎസ് മണ്ഡലം പ്രസിഡന്റ് ബിജു, എല്ജെപി ജില്ലാ വൈസ് പ്രസിഡന്റ് അനില്കുമാര് എന്നിവര് സംസാരിച്ചു. മണ്ഡലം ജനറല് സെക്രട്ടറിമാരായ മയ്യനാട് അജയന് സ്വാഗതവും തെക്കടം ഹരീഷ് നന്ദിയും പറഞ്ഞു.
