തലശ്ശേരി: കലാസാംസ്‌കാരിക രംഗത്തും മലഞ്ചരക്ക് വ്യാപാര രംഗത്തും പ്രത്യേകിച്ച് സര്‍ക്കസിന്റെ പേരിലും ലോകശ്രദ്ധതന്നെ പിടിച്ചുപറ്റിയിരുന്ന തലശ്ശേരിയുടെ ഇന്നത്തെ പരിതാപകരമായ അവസ്ഥക്ക് കാരണം തലശ്ശേരിയെ പ്രതിനിധീകരിച്ച് അധികാരസ്ഥാനങ്ങളിലെത്തിയ ഇടത്-വലത് മുന്നണി നേതാക്കളാണെന്ന് തലശ്ശേരിയിലെ എന്‍ഡിഎ സ്ഥാനാര്‍ത്ഥി വി.കെ.സജീവന്‍ പറഞ്ഞു. തലശ്ശേരി പ്രസ്‌ഫോറം ഇന്നലെ സംഘടിപ്പിച്ച മുഖാമുഖം പരിപാടിയില്‍ സംസാരിക്കുകയായിരുന്നു അദ്ദേഹം. ഇ.കെ.നായനാരെ വിജയിപ്പിച്ചു മുഖ്യമന്ത്രിയാക്കിയതും കോടിയേരി ബാലകൃഷ്ണനെ ജയിപ്പിച്ച് ആഭ്യന്തര മന്ത്രിയാക്കിയതും വി.ആര്‍.കൃഷ്ണയ്യരെ ജയിപ്പിച്ച് മന്ത്രിയാക്കിയതും തലശ്ശേരിയിലെ ജനങ്ങളാണ്. കൂടാതെ കേരള പിറവിക്ക് ശേഷം ഇന്നലെവരെ ഇവിടെ നിന്ന് നിയമസഭയിലേക്ക് തെരഞ്ഞെടുത്തത് എല്‍ഡിഎഫുകാരെയാണ്. അതോടൊപ്പം തന്നെ പ്രഥമ നഗരസഭ എന്നനിലയില്‍ അറിയപ്പെടുന്ന തലശ്ശേരിയെ വികസന മുരടിപ്പിലേക്ക് തള്ളിയിട്ടതില്‍ മുഖ്യപങ്ക് എല്‍ഡിഎഫ്-യുഎഡിഎഫ് മുന്നണികള്‍ക്കാണ്. തലശ്ശേരി നഗരസഭയുടെ പരിതാപകരമായ അവസ്ഥ നേരില്‍ കാണാന്‍ കൂടുതലൊന്നും സഞ്ചരിക്കേണ്ട ആവശ്യമില്ല. നഗരസഭയുടെ ബസ്സ്റ്റാന്റും കോംപ്ലക്‌സും ഒന്നു നേരില്‍ കണ്ടാല്‍ മതി. ഇത്രയും വൃത്തിഹീനമായ ഒരു പട്ടണം സംസ്ഥാനത്ത് മറ്റൊന്നുണ്ടാവില്ല. കുടിവെള്ള ക്ഷാമവും, യാത്രാദുരിതവുംകൊണ്ട് ജനം പൊറുതിമുട്ടിയിരിക്കുകയാണ്. രാഷ്‌ട്രീയ കൊലയാളികളെ സംരക്ഷിക്കുന്നതിനുവേണ്ടി നടത്തുന്ന ആസൂത്രണത്തിന്റെ പകുതി ആത്മാര്‍ത്ഥതയെങ്കിലും നഗരവികസന കാര്യങ്ങളില്‍ കാട്ടിയിരുന്നെങ്കില്‍ തലശ്ശേരിയിലെ ജനങ്ങള്‍ക്ക് മറ്റുനഗരങ്ങളിലെജനങ്ങളുടെ മുന്നില്‍ തലതാഴ്‌ത്തേണ്ട അവസ്ഥ യുണ്ടാകുമായിരുന്നില്ല. നാഷണല്‍ ഹൈവേ വണ്‍വേയാക്കിയിട്ടുള്ള ഒരു നഗരം ഈ രാജ്യത്ത് മറ്റൊന്നുണ്ടാവില്ല.
കഴിഞ്ഞ 38 വര്‍ഷമായി ബൈപ്പാസ് ബൈപ്പാസ് എന്ന് പറയുന്നതല്ലാതെ തലശ്ശേരി മാഹി ബൈപ്പാസ് യാഥാര്‍ത്ഥ്യമാക്കാന്‍ രണ്ടുമുന്നണികള്‍ക്കും കഴിഞ്ഞിട്ടില്ല. നരേന്ദ്രമോദി സര്‍ക്കാര്‍ കേന്ദ്രഭരണത്തിലെത്തിയതിന് ശേഷമാണ് ഇക്കാര്യം വീണ്ടും ചര്‍ച്ചക്ക് വന്നത്. സംസ്ഥാനത്തെ റോഡ് വികസനത്തിനായ് 34,000കോടി രൂപ നല്‍കാമെന്നും 110 രൂപക്ക് സിമന്റ് നല്‍കാമെന്നും മോദി സര്‍ക്കാര്‍ ഉറപ്പ് നല്‍കിയിട്ടും ഇരു മുന്നണികളും യാതൊരു താല്‍പര്യവും കാട്ടുന്നില്ല.
ഇടതും വലതും ഒന്നിച്ച് കേന്ദ്രം ഭരിച്ചിട്ടും ഒരു വികസനവും തലശ്ശേരിയിലെത്തിക്കാന്‍ ഇവര്‍ക്കായിട്ടില്ലെന്നും എന്നാല്‍ ഇതിനൊക്കെ മറുമരുന്ന് എന്ന നിലയില്‍ ഇത്തവണ തലശ്ശേരി മണ്ഡലത്തില്‍ ബിജെപിയെ ജയിപ്പിക്കാന്‍ മുഴുവനാളുകളും തയ്യാറാവുമെന്നാണ് വിശ്വസിക്കുന്നതെന്നും സജീവന്‍ പറഞ്ഞു. അങ്ങനെ സംഭവിച്ചാല്‍ തലശ്ശേരി ഒരു മാതൃകാ നഗരമാക്കി മാറ്റുമെന്നും മാലിന്യ പ്രശ്‌നത്തിനും കുടിവെള്ള ക്ഷാമത്തിനും ശാശ്വത പരിഹാരം ഉണ്ടാക്കുമെന്നും കൂടാതെ അത്യാധുനിക രീതിയില്‍ യോഗ-മെഡിറ്റേഷന്‍ കേന്ദ്രവും ഹൈടെക് മത്സ്യ-മാംസ പച്ചക്കറി മാര്‍ക്കറ്റും സ്ഥാപിക്കുമെന്നും തലശ്ശേരിയുടെ ശാപമായ ഗതാഗത തടസ്സം ഇല്ലായ്‌മ ചെയ്യാനാവശ്യമായ എല്ലാ നടപടികളും കൈക്കൊള്ളുമെന്നും സ്ഥാനാര്‍ത്ഥി വി.കെ.സജീവന്‍ ഉറപ്പ് നല്‍കി. അക്രമരാഷ്‌ട്രീയത്തെക്കുറിച്ച് ചോദിച്ചപ്പോള്‍ കൂടെ കിടക്കുന്ന സിപിഐയെ പോലും സിപിഎം വെറുതെ വിടുന്നില്ലല്ലോ എന്ന മറുചോദ്യയമാണ് സജീവന്‍ നല്‍കിയത്.
മുഖാമുഖം പരിപാടിയില്‍ പ്രസ്‌ഫോറം പ്രസിഡണ്ട് കെ.ജെ.ജോര്‍ജ്ജ് അധ്യക്ഷത വഹിച്ചു. ജോയിന്റ് സെക്രട്ടറി പി.എം.അഷറഫ് സ്വാഗതം പറഞ്ഞു. എ.പി.പത്മിനിടീച്ചര്‍, എന്‍.ഹരിദാസ് എന്നിവരും സജീവനോടൊപ്പം ഉണ്ടായിരുന്നു.
