മൊഹാലി: തുര്ച്ചയായി രണ്ട് പരാജയങ്ങള് ഏറ്റുവാങ്ങിയ കിങ്സ് ഇലവന് ഇന്ന് വീണ്ടും മൈതാനത്ത്. ഹോം ഗ്രൗണ്ടില് നടക്കുന്ന മത്സരത്തില് റൈസിങ് പൂനെ സൂപ്പര് ജയന്റസാണ് എതിരാളികള്. കഴിഞ്ഞ മത്സരത്തില് ഗുജറാത്ത് ലയണ്സിനോട് പരാജയപ്പെട്ട സൂപ്പര് ജയന്റ്സിനും ഇന്ന് വിജയം മാത്രം ലക്ഷ്യം.
വൈകിട്ട് നാലിന് കളി തുടങ്ങും.
മികച്ച കളിക്കാരുണ്ടായിട്ടും താളം കണ്ടെത്താന് കഴിയാത്തതാണ് കിങ്സ് ഇലവന്റെ ശാപം. മികച്ച ഹിറ്റര്മാരായ ഷോണ് മാര്ഷ്, ഗ്ലെന് മാക്സ്വെല്, ഡേവിഡ് മില്ലര് എന്നിവര് ഫോമിലേക്കുയര്ന്നാല് മാത്രമേ കിങ്സ് ഇലവന് രക്ഷയുള്ളൂ. കഴിഞ്ഞ രണ്ട് കളികളിലും ഓപ്പണര് മനന് വോറ മാത്രമാണ് ഭേദപ്പെട്ട ഇന്നിങ്സ് പുറത്തെടുത്തത്. എന്നാല് മില്ലറും മാക്സ്വെല്ലും തീര്ത്തും നിരാശപ്പെടുത്തുകയും ചെയ്തു. മിച്ചല് ജോണ്സണും മോഹിത് ശര്മ്മയും നയിക്കുന്ന ബൗളിങ് നിര മികച്ചതാണെങ്കിലും അവരും ശോഭിച്ചു തുടങ്ങിയിട്ടില്ല. സ്പിന്നര് അക്ഷര് പട്ടേല് ഭേദപ്പെട്ട പ്രകടനം നടത്തുന്നുണ്ട്.
അതേസമയം കഴിഞ്ഞ മത്സരത്തില് പരാജയപ്പെട്ടുവെങ്കിലും ധോണിപ്പട തികഞ്ഞ ആത്മവിശ്വാസത്തിലാണ്. രഹാനെയും ഡുപ്ലെസിസും കെവിന് പീറ്റേഴ്സണും ധോണിയും ഉള്പ്പെട്ട ബാറ്റിങ്നിര കഴിഞ്ഞ രണ്ട് മത്സരങ്ങളിലും മികച്ച പ്രകടനം നടത്തിയിരുന്നു. എന്നാല് ഓസീസ് നായകന് സ്റ്റീവന് സ്മിത്ത് ഫോമിലേക്കുയര്ന്നിട്ടില്ല എന്നതു മാത്രമാണ് അവരെ അലട്ടുന്നത്. ഇഷാന്ത് ശര്മ്മയും ആര്.പി. സിങും മിച്ചല് മാര്ഷും ഉള്പ്പെടുന്ന പേസര്മാരും ആര്.
അശ്വിനും മുരുകന് അശ്വിനും അടങ്ങുന്ന സ്പിന്നര്മാരും മികച്ച ഫോമിലാണ്. പ്രത്യേകിച്ചും ധോണിയുടെ പുതിയ കണ്ടെത്തലായ മുരുകന് അശ്വിന്.
എന്തായാലും ആദ്യ ജയം ലക്ഷ്യമിട്ട് കിങ് ഇലവനും കഴിഞ്ഞ മത്സരത്തിലെ പരാജയത്തില് നിന്ന് പാഠമുള്ക്കൊണ്ട് വിജയം ലക്ഷ്യമാക്കി പൂനെ സൂപ്പര് ജയന്റ്സും ഇറങ്ങുമ്പോള് വാശിയേറിയ പോരാട്ടം പ്രതീക്ഷിക്കാം.
