രാജ്കോട്ട്: ഐപിഎല് രണ്ടാം പതിപ്പിലെ നവാഗത ടീമുകളായ ഗുജറാത്ത് ലയണ്സും റൈസിങ് പൂനെ സൂപ്പര് ജയന്റ്സും ഏറ്റുമുട്ടും. ആദ്യ മത്സരത്തില് ഇരുടീമുകളും വിജയിച്ചാണ് സീസണ് തുടങ്ങിയത്.
ഇന്ത്യന് ക്യാപ്റ്റന് മഹേന്ദ്രസിങ് ധോണി നയിക്കുന്ന പൂനെ സൂപ്പര് ജയന്റ്സ് നിലവിലെ ചാമ്പ്യന്മാരായ മുംബൈ ഇന്ത്യന്സിനെയും ഗുജറാത്ത് ലയണ്സ് കരുത്തരായ കിങ്സ് ഇലവന് പഞ്ചാബിനെയുമാണ് ആദ്യ മത്സരത്തില് കീഴടക്കിയത്.
മുന്പ് ചെന്നൈ സൂപ്പര് കിങ്സില് ധോണിക്കൊപ്പമുണ്ടായിരുന്ന സുരേഷ് റെയ്നയാണ് ഗുജറാത്ത് ലയണ്സിന്റെ നായകന്.
മുംബൈ ഇന്ത്യന്സിനെതിരായ ആദ്യ മത്സരത്തില് ഓള് റൗണ്ട് പ്രകടനമാണ് പൂനെ ടീമിന് വിജയം സമ്മാനിച്ചത്. ബൗളര്മാരും ബാറ്റ്സ്മാന്മാരും മികച്ച പ്രകടനം നടത്തിയതോടെ ഒമ്പത് വിക്കറ്റിന്റെ വിജയമായിരുന്നു അവര് നേടിയത്. അജിന്ക്യ രഹാനെ, ഡുപ്ലെസിസ്, കെവിന് പീറ്റേഴ്സണ് എന്നിവര് മികച്ച ഫോമിലാണെന്ന് ആദ്യ മത്സരത്തില് തെൡയിച്ചു. ഒപ്പം സ്റ്റീവന് സ്മിത്ത്, ധോണി എന്നിവരും ഉള്പ്പെടുമ്പോള് ബാറ്റിങ് നിര അതിശക്തം.
മിച്ചല് മാര്ഷും ഇഷാന്ത് ശര്മ്മയും മുരുകന് അശ്വിനും ആര്.പി. സിങും ആര്. അശ്വിനും അടങ്ങുന്ന ബൗളിങ് നിരയും മികച്ച പ്രകടനമാണ് ആദ്യ മത്സരത്തില് നടത്തിയത്.
കിങ്സ് ഇലവന് പഞ്ചാബിനെ അഞ്ച് വിക്കറ്റിനാണ് ഗുജറാത്ത് ലയണ്സ് അരങ്ങേറ്റപ്പോരാട്ടത്തില് കീഴടക്കിയത്. ഓപ്പണര് ആരോണ് ഫിഞ്ചിന്റെയും ദിനേശ് കാര്ത്തിക്കിന്റെയും മികച്ച ബറ്റിങ്ങാണ് ലയണ്സിന് ആദ്യ മത്സരത്തില് വിജയം നേടിക്കൊടുത്തത്.
ബ്രണ്ടന് മക്കല്ലം ആദ്യ മത്സരത്തില് റണ്ണൊന്നുമെടുക്കാതെ പുറത്തായെങ്കിലും എപ്പോള് വേണമെങ്കിലും ഫോമിലേക്ക് തിരിച്ചെത്താന് കഴിയുന്ന താരമാണ്. മക്കല്ലം ഫോമിലേക്കുയര്ന്നാല് എതിര് ബൗളര്മാര് കുഴങ്ങുമെന്ന കാര്യത്തില് തര്ക്കമില്ല. ഒപ്പം ക്യാപ്റ്റന് സുരേഷ് റെയ്നയും ഫോമിലേക്കുയര്ന്നാല് പിടിച്ചുകെട്ടാന് സൂപ്പര് ജയന്റ്സ് ബൗളര്ക്ക് ഏറെ പണിപ്പെടേണ്ടിവരും. ഡ്വെയ്ന് ബ്രാവോയും ഫോക്നറും പ്രവീണ്കുമാറും ഉള്പ്പെട്ട ബൗളിങ് നിരയും അതിശക്തം.
കഴിഞ്ഞ മത്സരത്തില് നാല് വിക്കറ്റുകള് വീഴ്ത്തിയ ബ്രാവോ ട്വന്റി 20യില് 300 വിക്കറ്റുകള് നേടുന്ന ആദ്യതാരമായി. ഓള് റൗണ്ടര് രവീന്ദ്ര ജഡേജ ബാറ്റിങ്ങില് തിളങ്ങിയില്ലെങ്കിലും രണ്ട് വിക്കറ്റുകള് വീഴ്ത്തി ബൗളിങില് മികച്ച പ്രകടനം നടത്തി.
