ന്യൂദല്ഹി: വരാന്പോകുന്ന റിയോ ഒളിംപിക്സില് ഭാരതത്തിന്റെ ഷൂട്ടര് അഭിനവ് ഭിന്ദ്രയ്ക്ക് ഒരു മെഡല് ലഭിച്ചാല്, ഉറപ്പ്, അത് വിദേശകാര്യ മന്ത്രി സുഷമാ സ്വരാജിനുള്ള സമ്മാനമാകും. കാരണം, സുഷമയുടെ കൃത്യമായ ഇടപെടലില്ലായിരുന്നെങ്കില് ഭിന്ദ്രയ്ക്കൊപ്പം അദ്ദേഹത്തിന്റെ കോച്ചിന് പോകാനാവാതെ വന്നേനെ. എന്നല്ല, ജര്മ്മനിയില് കുടുങ്ങിപ്പോയേനെ.
ആഗസ്ത് അഞ്ചിന് ആരംഭിക്കുന്ന റിയോ ഒളിംപിക്സ് ഗെയിംസിനുള്ള യാത്രയിലായിരുന്നു അഭിനവ് ഭിന്ദ്രയും കോച്ചും. ജര്മ്മനിയിലെ കൊളോണില്വെച്ച് കോച്ചിന്റെ പാസ്പോര്ട്ട് കൈമോശം വന്നു. ഭിന്ദ്ര ഒട്ടും വൈകാതെ സുഷമാ സ്വരാജിന്റെ സഹായം തേടി ട്വിറ്ററില് കുറിച്ചു. ബ്രസീല് വിസയും യാത്രാ രേഖകളും വേണമെന്നായിരുന്നു ആവശ്യം. മൂന്നു മണിക്കൂറിനുള്ളില് സുഷമാ സ്വരാജ് കാര്യങ്ങള്ക്ക് തീരുമാനമുണ്ടാക്കി. ആദ്യം ഭിന്ദ്രയുടെ ഫോണ് നമ്പര് വാങ്ങി. മിനുട്ടുകള്ക്കകം ജര്മ്മനിയിലെ ഭാരത അംബാസഡര് ഗുജര്ജിത് സിങ് ഭിന്ദ്രയെ ബന്ധപ്പെട്ടു, എന്തു സഹായം വേണമെന്ന് ആരാഞ്ഞു.
അതിനിടെ, ആകെ സംഘര്ഷത്തിലായ ഭിന്ദ്രയെ ഒന്ന് ആശ്വസിപ്പിക്കാനും സംഘര്ഷം കുറയ്ക്കാനും സുഷമ ട്വീറ്റ് ചെയ്തു: എന്തു സഹായവും ചെയ്യാം, പക്ഷേ, ഒരു വാഗ്ദാനം നല്കണം, ഭാരതത്തിന് ഒരു ഒളിംപിക് മെഡല് നേടിത്തരണം. ഭിന്ദ്ര മറുപടി നല്കി: തീര്ച്ചയായും, മാഡത്തിന്റെ അനുഗ്രഹത്തോടെ. ഈ ലക്ഷ്യം നേടുന്നതില് ഒരു അവസരവും ഞാന് പാഴാക്കില്ല. അതിനിടെ, പിറ്റേന്ന് പാസ്പോര്ട്ടും മറ്റു യാത്രാരേഖകളും ലഭിച്ചു. ആശംസയറിയക്കുേമ്പാള് മന്ത്രി വീണ്ടും മെഡലിന്റെ കാര്യം ഓര്മ്മിപ്പിച്ചു. ഭിന്ദ്ര പറഞ്ഞു, തീര്ച്ചയായും, എല്ലാവരുടെയും ആഗ്രഹം പോലെ. സഹായങ്ങള്ക്ക് നന്ദി.
