ന്യൂദല്ഹി: ബാലഗോകുലം ദല്ഹിയില് പ്രവര്ത്തനമാരംഭിച്ചതിന്റെ 15-ാം വാര്ഷികാഘോഷങ്ങള് ഏപ്രില് 10,11 തീയതികളില് നടക്കും. ഗോകുലദര്ശനം എന്ന പേരിട്ടിരിക്കുന്ന ആഘോഷ പരിപാടിയില് രാജ്യതലസ്ഥാനത്തെ 60 ബാലഗോകുലങ്ങളിലെ കുട്ടികളും രക്ഷിതാക്കളും അടക്കം ആയിരങ്ങള് പങ്കുചേരും.
10ന് വൈകിട്ട് അഞ്ചുമണിക്ക് ന്യൂദല്ഹിയിലെ ത്യാഗരാജ സ്റ്റേഡിയത്തില് കേന്ദ്രമാനവ വിഭവശേഷി മന്ത്രി സ്മൃതി ഇറാനി ഗോകുലദര്ശനത്തിന്റെ ഉദ്ഘാടനം നിര്വഹിക്കും. കേന്ദ്രസാംസ്ക്കാരിക മന്ത്രി ഡോ. മഹേഷ് ശര്മ്മ, ആയുഷ് മന്ത്രി ശ്രീപാദ് നായിക് എന്നിവരും പരിപാടിയില് പങ്കെടുക്കും. ആര്എസ്എസ് അഖിലഭാരതീയ സഹപ്രചാര് പ്രമുഖ് ജെ. നന്ദകുമാര് മുഖ്യപ്രഭാഷണം നിര്വഹിക്കും.
പ്രസിദ്ധ സിനിമാ താരം സുരേഷ് ഗോപിയും പരിപാടിയില് പങ്കെടുക്കുന്നുണ്ട്. മഹാമണ്ഡലേശ്വര് ബ്രഹ്മര്ഷി കുമാര് സ്വാമിജി അനുഗ്രഹ പ്രഭാഷണം നടത്തുന്ന ചടങ്ങില് സ്വാഗതസംഘം ചെയര്മാന് എന്. വേണുഗോപാല്, വൈസ് ചെയര്മാന് എം.പി. ബാലകൃഷ്ണന്, മുഖ്യസംയോജകന് ബാബു പണിക്കര്, രാഹുല് ഈശ്വര്, സംഘാടക സമിതി ചീഫ് കോര്ഡിനേറ്റര് എം.ആര്. വിജയന് എന്നിവര് സംസാരിക്കും.
ഗുരുബാലകൃഷ്ണ മാരാര് നൃത്തസംവിധാനം ചെയ്ത് 1,544 കുട്ടികള് ചേര്ന്നവതരിപ്പിക്കുന്ന ‘സംസ്ക്കാര ഭാരത’ നൃത്തശില്പ്പമാണ് ഗോകുലദര്ശനം പരിപാടിയിലെ ഏറ്റവും പ്രധാനപ്പെട്ടത്. യോഗ, സൂര്യനമസ്ക്കാരം, ഭഗവത്ഗീത, ജ്ഞാനപ്പാന എന്നിവയ്ക്കൊപ്പം ഭരതനാട്യം, മോഹിനിയാട്ടം, കുച്ചിപ്പുടി, മണിപ്പൂരി നൃത്തം, കഥകളി തുടങ്ങിയ ഏഴോളം നൃത്തരൂപങ്ങളും അരങ്ങിലെത്തും. ദല്ഹിയിലെ വിവിധ ബാലഗോകുലങ്ങളിലെ മലയാളി കുടുംബങ്ങളില് നിന്നുള്ള കുട്ടികളാണ് പരിപാടികള് അവതരിപ്പിക്കുന്നത്. രാധാകൃഷ്ണ വേഷമിട്ട നൃത്തച്ചുവടുകളുമായി അഞ്ഞൂറോളം കുട്ടികളും ഗോകുലദര്ശനത്തിനെത്തും.
ഏപ്രില് 11ന് രാവിലെ 10മണിക്ക് കോണ്സ്റ്റിറ്റിയൂഷന് ക്ലബില് നടക്കുന്ന ‘ കുട്ടികളും അവരുടെ രാഷ്ട്രവിചിന്തനങ്ങളും’ എന്ന വിഷയത്തിലുള്ള സെമിനാറില് ദേശീയ സുരക്ഷാ ഉപദേഷ്ടാവ് അജിത് ഡോവല്, ഡോ. സുബ്രഹ്മണ്യം സ്വാമി, രാഹുല് ഈശ്വര് എന്നിവര് പങ്കെടുക്കും. ഭാരതത്തിലെയും വിദേശങ്ങളിലെയും ബാലഗോകുലങ്ങളില് നിന്നുള്ള തെരഞ്ഞെടുക്കപ്പെട്ട കുട്ടികളും മുതിര്ന്നവരും സെമിനാറില് പങ്കെടുക്കും.
കേന്ദ്രനഗര വികസന മന്ത്രി എം. വെങ്കയ്യ നായിഡു മുഖ്യരക്ഷാധികാരിയായ സ്വാഗത സംഘത്തില് കേന്ദ്രമന്ത്രിമാരായ ശ്രീപാദ് നായിക്, ഡോ. മഹേഷ് ശര്മ്മ, മുന് കേന്ദ്രമന്ത്രി ഒ. രാജഗോപാല്, ബ്രഹ്മചാരി നിജാമൃത ചൈതന്യ, കവി അക്കിത്തം, എസ്. സേതുമാധവന്, എ. ജയകുമാര് എന്നിവര് രക്ഷാധികാരികളാണ്. എന്. വേണുഗോപാല് ചെയര്മാനായ സമിതിയില് എംപി ബാലകൃഷ്ണന്, ബാബു പണിക്കര്, മാധവന് നായര്, ഓംചേരി എന്എന് പിള്ള, ലീല ഓംചേരി, എംകെജി പിള്ള, ആര്.ആര് നായര്, എം.എ കൃഷ്ണന്, ഹരീന്ദ്രന് മാസ്റ്റര് തുടങ്ങിയവര് അംഗങ്ങളാണ്.
ബാലഗോകുലം ദല്ഹി അധ്യക്ഷന് കെ.വി. രാമചന്ദ്രന് പ്രസിഡന്റായ സംഘാടക സമിതിയില് പി.കെ. സുരേഷ് ജനറല് സെക്രട്ടറിയായും എം. ആര്. വിജയന് മുഖ്യസംയോജകനായും പ്രവര്ത്തിക്കുന്നു.
