ചേര്ത്തല: രണ്ട് കോടി ചെലവഴിച്ചിട്ടും അമിനിറ്റി സെന്ററിന് പറയാനുള്ളത് പരാധീനതകള് മാത്രം. ദീര്ഘവീക്ഷണമില്ലാതെ കെട്ടിടം നിര്മിച്ചതു മൂലം സ്റ്റാന്ഡിലെത്തുന്ന യാത്രക്കാര് ദുരിതം പേറേണ്ട സ്ഥിതിയാണ്. അടിസ്ഥാന സൗകര്യങ്ങള് ഒരുക്കാതെ നിര്മ്മിച്ച കെട്ടിടം ചേര്ത്തല ഡിപ്പോയ്ക്ക് ബാധ്യതയായി. ഏക്കറു കണക്കിന് സ്ഥലമുള്ള ഡിപ്പോയില് സ്ഥലപരിമിതി മൂലം കഷ്ടപ്പെടുന്ന തരത്തിലാണ് പുതിയ കെട്ടിടം നിര്മ്മിച്ചിരിക്കുന്നത്.
ഒന്നരക്കോടിയോളം രൂപയാണ് എംഎല്എയുടെ ആസ്തി വികസന ഫണ്ടില് നിന്നും ഇതിനായി വിനിയോഗിച്ചതെന്നാണ് പറയപ്പെടുന്നത്. മണ്ഡലത്തിലെ വികസന പട്ടികയില് പേരെടുത്തു പറഞ്ഞ അമിനിറ്റി സെന്ററിന്റെ പ്രവര്ത്തനം ഉദ്ഘാടനം കഴിഞ്ഞ് മാസങ്ങള് പിന്നിട്ടിട്ടും കാര്യക്ഷമമായി പ്രവര്ത്തിച്ചിട്ടില്ല എന്നതാണ് വാസ്തവം.
തെരഞ്ഞെടുപ്പ് മുന്നില് കണ്ട് ലക്ഷങ്ങള് മുടക്കി തിടുക്കത്തില് ഉദ്ഘാടന മാമാങ്കം നടത്തിയതല്ലാതെ പുതിയ കെട്ടിടം യാത്രക്കാര്ക്കും ജീവനക്കാര്ക്കും ദുരിതമാണ് സമ്മാനിക്കുന്നത്. വൈദ്യുതി ബന്ധം നിലച്ചാല് പകരം സംവിധാനം ഒരുക്കാനും കെട്ടിടത്തില് നടപടിയായിട്ടില്ല. ത്രീഫേസ് കണക്ഷന് ഇല്ലാതെ വയറിങ് പൂര്ത്തിയാക്കിയതിനാല് ജനറേറ്റര് പ്രവര്ത്തിപ്പിക്കാന് കഴിയാത്ത സ്ഥിതിയാണെന്നാണ് വിമര്ശനം. ഇതിനായി ഭിത്തി തുരന്ന് വീണ്ടും വയറിങ് ചെയ്യേണ്ട അവസ്ഥയാണ്. രണ്ട് നിലകളിലായുള്ള കെട്ടിടത്തിന്റെ താഴത്തെ നിലയിലെ കടമുറികള് വാടകയ്ക്ക് നല്കി ഡിപ്പോയ്ക്ക് അധിക വരുമാനം ഉണ്ടാക്കാന് കഴിയുമെന്നായിരുന്നു പ്രതീക്ഷ. നാളിതുവരെ ടെന്ഡര് നടപടികള് പോലും പൂര്ത്തിയാക്കാന് കഴിഞ്ഞിട്ടില്ല. കാറ്റും വെളിച്ചവും ഇല്ലാത്ത നിലയിലാണ് ഓഫീസ് മുറികള് നിര്മ്മിച്ചിരിക്കുന്നത്.
ഏതാനും പ്ലാസ്റ്റിക് കസേരകള് ഇട്ടതല്ലാതെ യാത്രക്കാര്ക്ക് സൗകര്യപ്രദമായ ഇരിപ്പിടമോ സ്ത്രീകള്ക്ക് സുരക്ഷിതമായി വിശ്രമിക്കാനുള്ള സൗകര്യമോ ഇവിടെ ഇല്ല. സ്റ്റേഷന് മാസ്റ്റര് ഓഫീസല്ലാതെ എന്ക്വയറി കൗണ്ടര് പ്രവര്ത്തനം തുടങ്ങിയിട്ടില്ല.
അഞ്ഞൂറിലധികം വരുന്ന ഡ്രൈവറും കണ്ടക്ടര്മാരും അടക്കമുള്ളവര്ക്ക് വിശ്രമിക്കാനോ പ്രാഥമിക ആവശ്യങ്ങള്ക്കുള്ള സൗകര്യമോ കെട്ടിടത്തിലില്ല. ഓഫീസിന്റെ പ്രവര്ത്തനം പുതിയ കെട്ടിടത്തിലേക്ക് മാറ്റിയതോടെ കെഎസ്ആര്ടിസി ആവിഷ്ക്കരിച്ച തലതിരിഞ്ഞ പരിഷ്ക്കാരങ്ങളും യാത്രക്കാരെ വലയ്ക്കുകയാണ്. ആധുനിക സൗകര്യങ്ങളോടെയുള്ള വിശ്രമകേന്ദ്രമെന്ന പേരില് നിര്മിച്ച കെട്ടിടത്തില് ഇരിപ്പിടങ്ങള് പോലുമില്ലാതെ യാത്രക്കാര് വിശ്രമത്തിന് ഇടം തേടുകയാണ്.
