പുനരര്പ്പണം… ബിജെപി സ്ഥാപന ദിനമായിരുന്ന ഇന്നലെ ന്യൂദല്ഹിയില് പാര്ട്ടി സംഘടിപ്പിച്ച ആഘോഷ പരിപാടി അദ്ധ്യക്ഷന് അമിത് ഷാ ഉദ്ഘാടനം ചെയ്തപ്പോള്
ന്യൂദല്ഹി: രാജ്യത്തെ ജനകോടികളുടെ സ്വപ്ന സാക്ഷാത്ക്കാരമാണ് ബിജെപിയുടെ ലക്ഷ്യമെന്ന് പ്രധാനമന്ത്രി നരേന്ദ്ര മോദി. നിറഞ്ഞ രാജ്യസ്നേഹത്തോടെ ഭാരതത്തെ പുരോഗതിയുടെ ഉയരങ്ങളിലേക്ക് എത്തിക്കുകയാണ് ബിജെപി പ്രവര്ത്തകരുടെ കടമയെന്നും പ്രധാനമന്ത്രി പറഞ്ഞു. ബിജെപി സ്ഥാപന ദിനത്തോടനുബന്ധിച്ച് സംസാരിക്കുകയായിരുന്നു പ്രധാനമന്ത്രി.
ആത്മസമര്പ്പണത്തോടെ ബിജെപിയുടെ ഭാഗമായ കോടിക്കണക്കിന് ബിജെപി പ്രവര്ത്തകര്ക്ക് അഭിവാദ്യം അര്പ്പിച്ച പ്രധാനമന്ത്രി, സമൂഹത്തെ സേവിക്കുകയും ജനങ്ങളുടെ ആഗ്രഹ പൂര്ത്തീകരണം നടത്തുകയുമാണ് നമ്മുടെ കടമയെന്നും പറഞ്ഞു.
കശ്മീര് മുതല് കന്യാകുമാരി വരെയും കച്ച് മുതല് അരുണാചല് പ്രദേശ് വരെയുമുള്ള ജനങ്ങള് ബിജെപിയില് വിശ്വാസമര്പ്പിച്ചിരിക്കുകയാണ്. അവരുടെ സ്വപ്നങ്ങള് സാക്ഷാത്കരിക്കാന് ബിജെപിയുണ്ടെന്നാണവരുടെ വിശ്വാസം. അതു കാത്തു സൂക്ഷിക്കേണ്ട കടമ നമുക്കുണ്ട്, പ്രധാനമന്ത്രി കൂട്ടിച്ചേര്ത്തു. ബിജെപി ഭരണ സംസ്ഥാനങ്ങളിലെല്ലാം മികച്ച രീതിയിലാണ് ഭരണം നടക്കുന്നതെന്നും ഉത്സാഹശീലരായ മുഖ്യമന്ത്രിമാരാണ് ബിജെപിക്കുള്ളതെന്നും പ്രധാനമന്ത്രി പറഞ്ഞു.
രാജ്യത്തെ ഗ്രാമങ്ങളുടേയും ദരിദ്രരുടേയും കര്ഷകരുടേയും വികസനമാണ് നരേന്ദ്ര മോദി സര്ക്കാരിന്റെ പ്രാഥമിക ലക്ഷ്യമെന്നും ബിജെപി പ്രവര്ത്തകര് ഇതേ ലക്ഷ്യത്തിനായി പ്രവര്ത്തിക്കണമെന്നും ദേശീയ അധ്യക്ഷന് അമിത് ഷാ പറഞ്ഞു. എല്ലാ ദരിദ്രര്ക്കും സദ്ഭരണത്തിന്റെ പ്രയോജനങ്ങള് ലഭ്യമാക്കുകയാണ് ബിജെപിയുടെ ലക്ഷ്യം. പാര്ട്ടിക്കുവേണ്ടി സമര്പ്പിച്ച ലക്ഷക്കണക്കിന് പ്രവര്ത്തകരുടെ നിസ്വാര്ത്ഥ പ്രവര്ത്തനഫലമാണ് ഇന്നത്തെ നിലയിലേക്ക് പാര്ട്ടി എത്തിച്ചേര്ന്നത്.
1951ല് 11 പേരുമായി ആരംഭിച്ച ജനസംഘം ഇന്ന് 11 കോടി പ്രവര്ത്തകരുള്ള പ്രസ്ഥാനമായി വളര്ന്നിരിക്കുകയാണ്. ജനങ്ങളുടേയും സര്ക്കാരിന്റെയും ഇടയിലായിരിക്കണം പാര്ട്ടിയെന്നും അമിത് ഷാ പറഞ്ഞു.
