കൊച്ചി: കൂവപ്പടി ഗ്രാമത്തില് പുരാണപാരായണ സത്സംഗത്തിലൂടെ വീട്ടമ്മമാര്ക്കിടയില് ആധ്യാത്മിക ഔത്സുക്യം വളര്ത്തിയെടുക്കാനായി പ്രയത്നിച്ച ഗുരു നാദാപുരം ബാലാമണിയെ അമ്മമാരുടെ കൂട്ടായ്മ ആദരിച്ചു. കണ്ണൂര് നാദാപുരത്തെ പുത്തൂര് തറവാട്ടില് ജനിച്ച ബാലാമണി അഞ്ച് പതിറ്റാണ്ടിലേറെയായി മുംബൈ ബോറിവില്ലി ഈസ്റ്റിലാണ് താമസം. അവിടെ പ്രസിദ്ധമായ രാംനഗര് അയ്യപ്പക്ഷേത്രത്തിലെ സത്സംഗത്തിലൂടെയാണ് ആധ്യാത്മികപാരായണരംഗത്തേക്ക് വന്നെത്തിയത്. മുംബൈയിലെ കേരളീയ ഹൈന്ദവ സമാജങ്ങള്ക്കിടയില് അറിയപ്പെടുന്ന യജ്ഞപൗരാണികനായ, അന്ധേരി പരമേശ്വരഅയ്യര്ക്ക് കീഴില് ആധ്യാത്മിക പഠനമാരംഭിച്ച ബാലാമണി, 1992 മുതല് നാട്ടിലും മറുനാട്ടിലുമായി നൂറുകണക്കിന് സത്സംഗങ്ങള് സംഘടിപ്പിച്ചിട്ടുണ്ട്. കൂവപ്പടി ഗണപതിവിലാസം എന്എസ്എസ് കരേയാഗത്തിന് കീഴില് ആരംഭിച്ചിട്ടുള്ള സാന്ദ്രാനന്ദം സത്സംഗസമിതിയുടെ രൂപീകരണത്തിന് പ്രോത്സാഹനമേകിയതും ബാലാമണിയാണ്. ഗുരുവായൂരും ചോറ്റാനിക്കരയിലും ആറന്മുളയിലും തുടങ്ങി കേരളത്തിലെ ഒട്ടുമിക്ക പ്രധാന ക്ഷേത്രങ്ങളിലും നിരവധിതവണ ബാലാമണിയുടെ നേതൃത്വത്തിലുള്ള സംഘം ഭാഗവതവും നാരായണീയവും ദേവീമാഹാത്മ്യവും പാരായണം ചെയ്തിട്ടുണ്ട്. ഭാരതത്തിലെ എല്ലാ തീര്ത്ഥഘട്ടങ്ങൡലും സംഘമായി യാത്രചെയ്തിട്ടുണ്ട്. കഴിഞ്ഞ ഒരുവര്ഷത്തോളമായി കൂവപ്പടിയിലും പരിസരങ്ങളിലും ആധ്യാത്മിക പഠനക്ലാസുകള്ക്ക് നേതൃത്വം നല്കിവരികയായിരുന്നു. തോട്ടുവ ശ്രീധന്വന്തരി ക്ഷേത്രത്തില് ഇക്കഴിഞ്ഞ ജനുവരി 20 ന് ഏകാദശി ദിവസം ശിഷ്യഗണങ്ങളുടെ അരങ്ങേറ്റവും നടത്തി. ഒരുവര്ഷം നീണ്ട ശ്രമങ്ങള്ക്കൊടുവില് സാന്ദ്രാനന്ദം സത്സംഗസമിതി രൂപീകരിക്കാനായതിന്റെ സന്തോഷത്തില് വ്യാഴാഴ്ച മുംബൈയിലേക്ക് തിരിച്ചുപോകുന്ന ഗുരു ബാലാമണിയെ ആദരിക്കാനായി കൂവപ്പടി രോഹിണി വില്ലയില് വിളിച്ചുചേര്ത്ത യോഗത്തില് സമിതി പ്രസിഡന്റ് കെ. സാവിത്രിയമ്മ അധ്യക്ഷത വഹിച്ചു. സെക്രട്ടറി എന്. സത്യവതി ഉപഹാരങ്ങള് കൈമാറി. കെ.കെ. ശാരദക്കുഞ്ഞമ്മ നന്ദി പറഞ്ഞു.
ഗുരുനാദാപുരം ബാലാമണിയെ ആദരിച്ചു
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.