കൊച്ചി: കറുവപ്പട്ടക്ക് പകരം മാരക വിഷം അടങ്ങിയ കാസിയ ഇറക്കുമതി ചെയ്ത് വില്പന നടത്തുന്നതും ആയുര്വേദ മരുന്നിലും മസാലയിലുമെല്ലാം ചേര്ക്കുന്നതിനുമെതിരെയുള്ള നിയമനടപടികള് ഇഴയുകയാണെന്ന് കാസിയ ഇറക്കുമതിക്കെതിരെ നിയമപോരാട്ടം നടത്തുന്ന ലിയാനാര്ഡ് ജോണ് വാര്ത്താസമ്മേളനത്തില് ആരോപിച്ചു. കാസിയ ഗുരുതര രോഗങ്ങള്ക്കിടയാക്കുമെന്നും ഇറക്കുമതിയും വിപണനവും തടയണമെന്നും കാണിച്ച് സ്പൈസസ് ബോര്ഡ് 2008 ഏപ്രില് നാലിനു അയച്ച കത്ത് ഫോറിന് ട്രേഡ് ഡെപ്യൂട്ടി ഡയറക്ടര് ജനറലിന്(ഡിജിഎഫ്ടി) ഈ മാസം ഏഴിനാണ് ലഭിച്ചിരിക്കുന്നതെന്ന് വിവരാവകാശ രേഖകള് വ്യക്തമാക്കുന്നു. കാസിയ ഇറക്കുമതിയും വിപണനവും നിരോധിക്കണമെങ്കില് ഇനി ഫുഡ് സേഫ്റ്റി വിഭാഗത്തിന്റെ വിശദീകരണത്തിനായി കാത്തുനില്ക്കുകയാണ് ഡിജിഎഫ്ടി. കാസിയ ഇറക്കുമതിയില് വന് അഴിമതിയാണ് നടക്കുന്നത്. ഇതിനെതിരെ സെന്ട്രല് വിജിലന്സ് കമ്മീഷനും ക്രൈംബ്രാഞ്ചിന്റെ വാണിജ്യ കുറ്റാന്വേഷണ വിഭാഗവും ഡയറക്ടര് ജനറല് ഓഫ് ഫോറിന് ട്രേഡും ആയുഷ് വകുപ്പും അന്വേഷണം നടത്തുന്നതായും ലിയാനോര്ഡ് ജോണ് പറഞ്ഞു.
