ന്യൂദല്ഹി: ന്യൂസിലാന്ഡ്-പാക്കിസ്ഥാന് മത്സരത്തിനെത്തിയ കാണികളെക്കുറിച്ചുള്ള പരാമര്ശത്തിന് പാക്കിസ്ഥാന് നായകന് ഷാഹിദ് അഫ്രീദിക്കെതിരെ വ്യാപക പ്രതിഷേധം. ബിസിസിഐ സെക്രട്ടറി അനുരാഗ് താക്കൂര് അടക്കമുള്ളവര് അഫ്രീദിയെ ശക്തമായി വിമര്ശിച്ച് രംഗത്തെത്തി. മത്സരം കാണാനെത്തിയവരില് കശ്മീരികളുമുണ്ടെന്നായിരുന്നു മത്സരത്തിന്റെ ടോസിനു ശേഷമുള്ള അഭിമുഖത്തില് പാക് നായകന് പറഞ്ഞത്.
ഇത്തരം പ്രസ്താവനകള് നടത്തുന്നത് രാഷ്ട്രീയമായി ശരിയല്ലെന്ന് അനുരാഗ് താക്കൂര് പറഞ്ഞു. താരങ്ങള് ഇത്തരം പ്രസ്താവനകള് നടത്തരുത്. ഈ സമീപനം കാരണമാണ് പാക്കിസ്ഥാനിലും അഫ്രീദി വിമര്ശിക്കപ്പെടുന്നത്- അനുരാഗ് താക്കൂര് ചൂണ്ടിക്കാട്ടി. ഇന്ത്യന് ആരാധകരെ പുകഴ്ത്തി സംസാരിച്ചതിനും ഇന്ത്യയോട് തോറ്റതിനും പാക്കിസ്ഥാനില് ഉയര്ന്ന രോഷം ശമിപ്പിക്കാനാണ് അഫ്രീദി ഇത്തരമൊരു പ്രസ്താവനയുമായി രംഗത്തെത്തിയതെന്ന് കരുതുന്നു. തുടര് തോല്വികളും ടീമില് തനിക്കെതിരെയുള്ള പടയൊരുക്കങ്ങളും ഇതിലൂടെ നേരിടാമെന്നും പാക് നായകന് കരുതി.
ന്യൂസിലന്ഡിനെതിരെ ടോസിനു വരുമ്പോള് ഗ്യാലറിയില്നിന്ന് ഒരുകൂട്ടം ആരാധകര് അഫ്രീദിയെ അഭിവാദ്യം ചെയ്തു. ഇതു ചൂണ്ടിക്കാട്ടി ടിവി ആങ്കറായ മുന് പാക് നായകന് റമീസ് രാജ ആരാധക പിന്തുണയെക്കുറിച്ച് ചോദിച്ചപ്പോഴാണ് അഫ്രീദി വിവാദ പരാമര്ശം നടത്തിയത്. തങ്ങളെ പിന്തുണച്ച കൊല്ക്കത്തയിലെ ആരാധകര്ക്ക് നന്ദി പറയുന്നുവെന്നും അഫ്രീദി പറഞ്ഞിരുന്നു.
