കോഴഞ്ചേരി: ആറന്മുള പാഞ്ചജന്യം ആഡിറ്റോറിയത്തില്‍ നടന്ന പള്ളിയോട സേവാസംഘത്തിന്റെ പൊതുയോഗത്തില്‍ പള്ളിയോട സേവാസംഘം ഗ്രാന്റ് വിതരണം നടന്നു.
തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പ്രയാര്‍ ഗോപാലകൃഷ്ണന്‍ ചെന്നിത്തല പള്ളിയോട ഭാരവാഹികള്‍ക്ക് ചെക്ക് കൈമാറിയാണ് ഗ്രാന്റ് വിതരണം ഉദ്ഘാടനം നടന്നത്. ആറന്മുള ക്ഷേത്രത്തില്‍ നിര്‍മ്മിച്ചുകൊണ്ടിരിക്കുന്ന ആനക്കൊട്ടിലിന്റെ പൂര്‍ത്തീകരണത്തിനായി കരകളുടെ സഹകരണത്തോടുകൂടി സമാഹരിച്ച ഒരുലക്ഷം രൂപാ ക്ഷേത്രോപദേശകസമിതി സെക്രട്ടറി അനില്‍കുമാര്‍, ഏകോപന സമിതി പ്രസിഡന്റ് ശശിധരന്‍നായര്‍ എന്നിവര്‍ സേവാസംഘം പ്രസിഡന്റ് ഡോ.കെ.ജി.ശശിധരന്‍പിള്ളയില്‍ നിന്നും ഏറ്റുവാങ്ങി. വള്ളസദ്യ വഴിപാടുകള്‍ ഓണ്‍ലൈനായി ബുക്കു ചെയ്യുന്നതിനായി കമ്പ്യൂട്ടറൈസേഷന്‍ സംവിധാനം ദേവസ്വം ബോര്‍ഡ് മെമ്പര്‍ പി.കെ.കുമാരന്‍ സ്വിച്ച് ഓണ്‍ ചെയ്തു നിര്‍വ്വഹിച്ചു. പള്ളിയോട സേവാസംഘം സ്ഥാപക പ്രസിഡന്റ് വിരുത്തിയേത്ത് ഗോപാലകൃഷ്ണപിള്ളയുടെ എണ്ണഛായ ചിത്രം ദേവസ്വം ബോര്‍ഡ് പ്രസിഡന്റ് പ്രയാര്‍ ഗോപാലകൃഷ്ണന്‍ അനാച്ഛാദനം ചെയ്തു. യോഗത്തില്‍ സേവാസംഘം പ്രസിഡന്റ് ഡോ.കെ.ജി.ശങ്കരന്‍പിള്ള അദ്ധ്യക്ഷത വഹിച്ചു. സെക്രട്ടറി രാധാകൃഷ്ണന്‍, ജോ.സെക്രട്ടറി രാഹുല്‍രാജ്, വൈസ് പ്രസിഡന്റ് കെ.പി.സോമന്‍, ഖജാന്‍ജി ബി.കൃഷ്ണകുമാര്‍ എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: