ന്യൂദല്ഹി: കോഴ വാങ്ങിയ തൃണമൂല് കോണ്ഗ്രസ് എംപിമാരുടെ നടപടിയില് പാര്ലമെന്റില് വന് ബഹളം. പാര്ലമെന്റ് ഒന്നടങ്കം തൃണമൂല് എംപിമാര്ക്കെതിരെ രംഗത്തെത്തി. എംപിമാരെ സഭയില്നിന്ന് പുറത്താക്കണമെന്നു വരെ അംഗങ്ങള് ആവശ്യപ്പെട്ടു. രാജ്യത്തിനു നാണക്കേടുണ്ടാക്കിയ സംഭവത്തില് അന്വേഷണം നടത്തുന്നതിന് സര്ക്കാര് തയാറാണെന്നും അല്ലെങ്കില് സ്പീക്കര്ക്ക് അന്വേഷണം പ്രഖ്യാപിക്കാമെന്നും പാര്ലമന്ററികാര്യ മന്ത്രി എം. വെങ്കയ്യ നായിഡു ലോക്സഭയിലെ ചര്ച്ചകള്ക്ക് മറുപടിയായി പറഞ്ഞു.
പാര്ലമെന്റിന്റെ അന്തസ് പണയം വച്ചു. സത്യം പുറത്തുവരണം. ഗൂഢാലോചനയെന്നു പറഞ്ഞാല് ജനം വിശ്വസിക്കില്ലെന്നും വെങ്കയ്യ.
ലോക്സഭയില് സീറോ അവറില് ബംഗാളില്നിന്നുള്ള സിപിഎം അംഗം മുഹമ്മദ് സലീമാണ് വിഷയം ഉന്നയിച്ചത്. ഇത്തരക്കാര്ക്കൊപ്പമാണ് ഇരിക്കുന്നതെന്നതില് തലതാഴുന്നുവെന്ന് മുഹമ്മദ് സലീം പറഞ്ഞു. തൃണമൂല് എംപിമാരുടെ പ്രവൃത്തികൊണ്ട് പാര്ലമെന്റിന്റെ അന്തസ് ഇടിഞ്ഞുവെന്നും അദ്ദേഹം.
പാര്ലമെന്റിനും ജനാധിപത്യ സംവിധാനത്തിനും സംഭവം പരിക്കേല്പ്പിച്ചുവെന്ന് തുടര്ന്ന സംസാരിച്ച ബിജെപി അംഗം എസ്.എസ്. അലുവാലിയ ചൂണ്ടിക്കാട്ടി. അഞ്ച് എംപിമാരാണ് കോഴ വാങ്ങിയത്.
വിഷയം എത്തിക്സ് കമ്മറ്റിക്ക് വിടണമെന്നും അദ്ദേഹം ആവശ്യപ്പെട്ടു. പാര്ലമെന്റിന്റെ അന്തസ് ഇടിഞ്ഞുവെന്നും വിഷയത്തില് സമഗ്രാന്വേഷണം വേണമെന്നും കോണ്ഗ്രസ് അംഗം അധീര് രഞ്ജന് ചൗധരിയും ആവശ്യപ്പെട്ടു.
തങ്ങള്ക്കെതിരെ പാര്ലമെന്റ് ഒന്നടങ്കം അണിനിരക്കുമ്പോഴും കാര്യമായ പ്രതികരണത്തിനു മുതിര്ന്നില്ല തൃണമൂല് കോണ്ഗ്രസ് അംഗങ്ങള്. വിഷയത്തില് പ്രതികരിച്ച ആരോപണവിധേയനായ സുഗത റോയ് ബംഗാള് തെരഞ്ഞെടുപ്പ് മുന്നില്ക്കണ്ട് ബിജെപി, കോണ്ഗ്രസ്, സിപിഎം എന്നിവര് ചേര്ന്നു നടത്തിയ ഗൂഢാലോചനയാണിതെന്നു മാത്രമാണ് പറഞ്ഞത്. രാജ്യസഭയിലും കക്ഷിഭേദമെന്യേ അംഗങ്ങള് ഈ വിഷയമുയര്ത്തി.
