മുംബൈ: കള്ളപ്പണ കേസില് മുന് മഹാരാഷ്ട്ര പൊതുമരാമത്ത് മന്ത്രിയും എന്സിപി നേതാവുമായ ഛഗന് ഭുജ്ബലിനെ എന്ഫോഴ്സ്മെന്റ് ഡയറക്ടറേറ്റ് (ഇ.ഡി) അറസ്റ്റ് ചെയ്തു. തിങ്കളാഴ്ച ചോദ്യം ചെയ്യലിനുശേഷമായിരുന്നു അറസ്റ്റ്. ഇദ്ദേഹത്തെ ഇന്ന് കോടതിയില് ഹാജരാക്കും.
സമന്സ് പ്രകാരം രാവിലെ 11ന് ദക്ഷിണ മുംബൈയിലെ ബെല്ലാര്ഡ് എസ്റ്റേറ്റിലുള്ള ഇ.ഡി ആസ്ഥാനത്ത് ഭുജ്ബല് എത്തുകയായിരുന്നു. അഭിഭാഷകനൊപ്പമാണ് ഭുജ്ബല് ചോദ്യംചെയ്യലിന് വിധേയനായത്. നിരോധാജ്ഞ ലംഘിച്ച് ഇ.ഡി കാര്യാലയ പരിസരത്ത് തടിച്ചുകൂടുകയും ഭുജ്ബലിന് അനുകൂലമായി മുദ്രാവാക്യം വിളിക്കുകയും ചെയ്ത എന്.സി.പി പ്രവര്ത്തകരെ പൊലീസ് അറസ്റ്റ്ചെയ്ത് നീക്കി. അണികള് വരുമെന്നു കണ്ട് പൊലീസ് പരിസരത്ത് നിരോധാജ്ഞ ഏര്പ്പെടുത്തുകയായിരുന്നു.
കള്ളപ്പണം വെളുപ്പിക്കലുമായി ബന്ധപ്പെട്ട് നിരവധി കേസുകളാണ് നിലവില് ഛഗന് ഭുജ്ബാലിന്റെ പേരില് ചുമത്തപ്പെട്ടിരിക്കുന്നത്. കഴിഞ്ഞ മാസമാണ് മഹാരാഷ്ട്ര സദന് നിര്മ്മാണത്തില് അഴിമതിയുണ്ടെന്നും അതില് ഭുജ്പാലിനും കുടുംബത്തിനും വ്യക്തമായ പങ്കുണ്ടെന്നും ചൂണ്ടിക്കാട്ടി മഹാരാഷ്ട്ര ആന്റി കറപ്ഷന് ബ്യൂറോ മുംബൈ സെഷന്സ് കോടതിയില് കുറ്റപത്രം സമര്പ്പിച്ചത്.
ഫെബ്രുവരി ഒന്നിന് ഛഗന് ഭുജ്ബാലിന്റെ സഹോദരീപുത്രനായ സമീര് ഭുജ്ബാലിനെ കേസുമായി ബന്ധപ്പെട്ട് എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തിരുന്നു. ഭൂരിഭാഗം കേസുകളും എന്ഫോഴ്സ്മെന്റ് ഡയറക്ടറേറ്റിന്റെ അന്വേഷണത്തിലാണ്.
മഹാരാഷ്ട്ര സദന് അഴിമതി, കലിന ഭൂമി തട്ടിപ്പ് എന്നിവയുടെ അന്വേഷണവുമായി ബന്ധപ്പെട്ട് കള്ളപ്പണ നിരോധന നിയമപ്രകാരം രണ്ട് എഫ്ഐആറുകളാണ് ഭുജ്ബാലിനെതിരെ ആന്റി കറപ്ഷന് ബ്യൂറോ രജിസ്റ്റര് ചെയ്തിരിക്കുന്നത്. കൂടാതെ ഭുജ്ബാല് മഹാരാഷ്ട്ര പൊതുമരാമത്ത് മന്ത്രിയായിരുന്നപ്പോള് അനുവദിച്ചുനല്കിയ കരാറുകളെക്കുറിച്ചും പരിശോധിക്കുന്നുണ്ടെന്ന് അന്വേഷണ സംഘം വ്യക്തമാക്കി.
മുംബൈ, നവി മുംബൈ, നാസിക് എന്നിവിടങ്ങളിലുള്ള ഭുജ്ബലിന്റെ ഓഫീസുകളിലും വീടുകളിലും ഫാം ഹൗസുകളിലും റെയ്ഡ് നടത്തിയ എസിബി രേഖകളും ആഭരണങ്ങളും കണ്ടെടുത്തിരുന്നു.
