ലണ്ടന്: അവസാന അഞ്ചു മിനിറ്റിനിടെ വീണ രണ്ടു ഗോളുകള്ക്കു റീഡിങ്ങിനെ വീഴ്ത്തി ക്രിസ്റ്റല് പാലസ് എഫ്എ കപ്പ് ഫുട്ബോളിന്റെ സെമിയില്. 86ാം മിനിറ്റില് പെനല്റ്റിയിലൂടെ യൊഹാന് കബായെയും ഇഞ്ചുറി ടൈമില് ഫ്രെയ്സര് കാംപെല്ലുമാണ് ക്രിസ്റ്റലിന് അവസാന നാലിലേക്ക് ടിക്കറ്റ് സമ്മാനിച്ചത്.
അധിക സമയത്തേക്കെന്നു കരുതിയ പോരാട്ടമാണ് കബായെ കഴുകന്മാരുടെ പേരിലേക്ക് മാറ്റിയെഴുതിയത്. യാന്നിക് ബൊലെയ്സിനെ ജാക് കൂപ്പര് ബോക്സില് വീഴ്ത്തിയതിനാണ് പെനല്റ്റി ലഭിച്ചത്. കൂപ്പറിന് രണ്ടാം മഞ്ഞക്കാര്ഡും പുറത്തേക്കുള്ള വഴിയും നല്കി റഫറി. കിക്കെടുത്ത കബായെ അതുവരെ തകര്പ്പന് പ്രകടനം നടത്തിയ റീഡിങ് ഗോളി അലി അല് ഹബ്സിക്ക് അവസരമൊന്നും നല്കാതെ പന്ത് വലയിലാക്കി. സമയം കൊല്ലാന് ക്രിസ്റ്റല് പന്ത് തട്ടിക്കളിക്കുന്നതിനിടെ റീഡിങ്ങിനു സംഭവിച്ച പ്രതിരോധ പിഴവാണ് കാംപെല്ലിന്റെ രണ്ടാം ഗോളിലേക്കു വഴിതെളിച്ചത്.
