ജോഹന്നസ്ബര്ഗ്: അവസാന പന്തുവരെ ആവേശം അലതല്ലിയ പോരാട്ടം ഓസ്ട്രേലിയക്ക് ത്രസിപ്പിക്കുന്ന വിജയം. ദക്ഷിണാഫ്രിക്കക്കെതിരായ ട്വന്റി 20 പരമ്പരയിലെ രണ്ടാം മത്സരത്തില് അഞ്ച് വിക്കറ്റിനാണ് വിജയം കരസ്ഥമാക്കിയത്. ആദ്യം ബാറ്റ് ചെയ്ത ദക്ഷിണാഫ്രിക്ക 20 ഓവറില് ഏഴു വിക്കറ്റ് നഷ്ടത്തില് 204 റണ്സ് അടിച്ചുകൂട്ടി. മറുപടി ബാറ്റിങ്ങിനിറങ്ങിയ ഓസ്ട്രേലിയ അഞ്ച് വിക്കറ്റുകള് നഷ്ടപ്പെടുത്തി 205 റണ്സെടുത്ത് വിജയം സ്വന്തമാക്കുകയായിരുന്നു. ഇതോടെ മൂന്ന് മത്സരങ്ങളുടെ പരമ്പര 1-1 എന്ന നിലയിലായി.
40 പന്തില് നിന്ന് 6 ഫോറും അഞ്ച് സിക്സറുമടക്കം 77 റണ്സെടുത്ത ഡേവിഡ് വാര്ണറുടെയും 43 പന്തില് നിന്ന് 7 ഫോറും മൂന്ന് സിക്സറുമടക്കം 75 റണ്സെടുത്ത ഗ്ലെന് മാക്സ്വെല്ലിന്റെയും കരുത്തിലാണ് കൈവിട്ടുപോകുമെന്ന് കരുതിയ വിജയം കംഗാരുക്കള് കൊത്തിയെടുത്തത്. മൂന്നിന് 32 എന്ന നിലയില് നിന്നാണ് വാര്ണറും മാക്സ്വെലും ചേര്ന്ന് ടീമിനെ വിജയത്തിലേക്ക് നയിച്ചത്.
നേരത്തെ 41 പന്തില് നിന്ന് അഞ്ച് വീതം ഫോറും സിക്സറുമടക്കം 79 റണ്സെടുത്ത ക്യാപ്റ്റന് ഡുപ്ലെസിസിന്റെയും 28 പന്തില് നിന്ന് 44 റണ്സെടുത്ത ഓപ്പണര് ഡി കോക്കിന്റെയും 18 പന്തില് നിന്ന് 33 റണ്സെടുത്ത ഡേവിഡ് മില്ലറുടെയും കരുത്തിലാണ് ദക്ഷിണാഫ്രിക്ക 204 റണ്സ് അടിച്ചുകൂട്ടിയത്.
