കോഴിക്കോട്: ടെണ്ട ര്പോലും പൂര്ത്തിയാകാതെ കോഴിക്കോട് ലൈറ്റ്മെട്രോയുടെ പ്രാരംഭപ്രവര്ത്തനങ്ങള് ഉദ്ഘാടനം ചെയ്തത് യുഡിഎഫിന്റെയും മുഖ്യമന്ത്രി ഉമ്മന്ചാണ്ടിയുടെയും തെരഞ്ഞെടുപ്പ് മുന്നില്കണ്ടുകൊണ്ടുള്ള രാഷ്ട്രീയ തട്ടിപ്പാണെന്ന് ബിജെപി ജില്ലാ പ്രസിഡന്റ് ടി. പി. ജയചന്ദ്രന് മാസ്റ്റര് കുറ്റപ്പെടുത്തി. പദ്ധതി പ്രവര്ത്തനം ഉദ്ഘാടനം ചെയ്തെന്ന് വരുത്തിതീര്ക്കാനുള്ള യുഡിഎഫിന്റെയും മുഖ്യമന്ത്രിയുടെയും കപടനാടകം ജനങ്ങള് തിരിച്ചറിയുമെന്നും അദ്ദേഹം പ്രസ്താവനയില് പറഞ്ഞു.
പദ്ധതിയുടെ എസ്റ്റിമേറ്റ് തയ്യാറാക്കി ടെണ്ടര് നല്കിയിട്ടാണ് പ്രാരംഭപ്രവര്ത്തനങ്ങളുടെ ഉദ്ഘാടനം നടത്തേണ്ടത്. എന്നാല് ലൈറ്റ്മെട്രോയുടെ ടെണ്ടര് നടപടികള് പോലും ഇതേവരെ പൂര്ത്തിയായിട്ടില്ല. ലൈറ്റ് മെട്രോ എന്താണെന്ന് പോലും വ്യക്തമാക്കാതെയാണ് ഉദ്ഘാടനം നടത്തിയത്. പദ്ധതിയെകുറിച്ച് ജനപ്രതിനിധികളുമായി പോലും ചര്ച്ച ചെയ്യാന് സര്ക്കാര് തയ്യാറായിട്ടില്ല. പദ്ധതിയുടെ നടത്തിപ്പിനെകുറിച്ചോ ചെലവിനെക്കുറിച്ചോ ഇതേവരെ വ്യക്തമാക്കിയിട്ടില്ല. ഇക്കഴിഞ്ഞ ലോക്സഭാ തെരഞ്ഞെടുപ്പില് കോഴിക്കോട് മോണോറെയില് പദ്ധതിയുടെ പേരിലായിരുന്നു യുഡിഎഫ് രാഷ്ട്രീയനാടകം കളിച്ചത്. എന്നാല് പിന്നീട് പ്രായോഗികമല്ലെന്ന് പറഞ്ഞ് പദ്ധതി തുടങ്ങിയേടത്തുതന്നെ ഉപേക്ഷിക്കുകയായിരുന്നു. ഇതിന്റെ തനിയാവര്ത്തനമാണ് ലൈറ്റ്മെട്രോ പദ്ധതിയുടെ പേരിലും നടക്കുന്നതെന്ന് ടി.പി. ജയചന്ദ്രന് മാസ്റ്റര് പറഞ്ഞു.
തെരെഞ്ഞെടുപ്പ് അടുത്തവേളയില് നാടുനീളെ ഉദ്ഘാടന മാമാങ്കവും ഇതിന്റെ പരസ്യങ്ങളും നല്കി രക്ഷപ്പെടാമെന്നത് യുഡിഎഫിന്റെയും മുഖ്യമന്ത്രിയുടെയും വ്യാമോഹം മാത്രമാണെന്നും അദ്ദേഹം പ്രസ്താവനയില് കൂട്ടിച്ചേര്ത്തു.
