കലഞ്ഞൂര്‍ ജംഗ്ഷനില്‍ മാലിന്യങ്ങളുടെ ദുര്‍ഗന്ധം അസഹനീയമാകുന്നു

കലഞ്ഞൂര്‍: ജംഗ്ഷനില്‍ ക്ഷേത്ര ആല്‍ത്തറ മണ്ഡപ പരിസരവും മലിന ജലത്തിന്റെ ദുര്‍ഗന്ധം നിറഞ്ഞ് ഭക്ത ജനങ്ങള്‍ക്കും പ്രദേശ വാസികള്‍ക്കും അസഹനീയമാകുന്നു. കലഞ്ഞൂര്‍ ജംഗ്ഷനില്‍ നിന്നും ആല്‍ത്തറ മണ്ഡപത്തിന് മുന്നിലൂടെ കടന്നുപോകുന്ന ഓടയില്‍ മലിനജലം കെട്ടിക്കിടക്കുന്നതാണ് അസഹനീയമായ ദുര്‍ഗന്ധത്തിന് കാരണം. കൊതുക് ശല്യം പെരുകുന്നത് പ്രദേശത്ത് ആരോഗ്യ പ്രശ്‌നങ്ങള്‍ സൃഷ്ടിക്കുന്നുണ്ട്. വ്യാപാര സ്ഥാപനങ്ങളില്‍നിന്നും ഹോട്ടലുകളില്‍നിന്നുമുള്ള മലിനജലവും മാലിന്യവും മാസങ്ങളായി ഓടയില്‍ കെട്ടിക്കിടക്കുന്നതാണ് ഇതിന് കാരണം ആല്‍ത്തറ പരിസരത്ത് ഭക്തജനങ്ങള്‍ക്ക് ബുദ്ധിമുട്ടുണ്ടാക്കുന്നത്. കലഞ്ഞൂര്‍ മഹാദേവ ക്ഷേത്രത്തിലെ ഉത്സവുമായി ബന്ധപ്പെട്ട് പള്ളിവേട്ട, ആറാട്ട് നടക്കേണ്ട വിശുദ്ധമായ സ്ഥലത്താണ് മലിനജലം നിറയുന്നത്. പല തവണ നാട്ടുകാര്‍ പരാതിപ്പെട്ടിട്ടും അധികൃതരുടെ ഭാഗത്തുനിന്ന് നിഷേധാത്മകമായ നിലപാടാണ് സ്വീകരിക്കുന്നത്. കലഞ്ഞൂര്‍ ഗ്രാമപഞ്ചായത്തിന്റെ മുന്നിലൂടെ കടന്നുപോകുന്ന ഓട വൃത്തിയാക്കാന്‍ പഞ്ചായത്ത് യാതൊരു നടപടികളും സ്വീകരിച്ചിട്ടില്ല. തൃക്കലഞ്ഞൂര്‍ മഹാദേവ സേവാസംഘം മുന്‍കൈയ്യെടുത്ത് ക്ഷേത്രപരിസരത്തുനിന്ന് റോഡ് വരെ ഓട നിര്‍മ്മിച്ച് നല്‍കിയിട്ടുണ്ട്. കൂടാതെ വ്യാപാരികള്‍ ദുര്‍ഗന്ധം സഹിക്കാതെ ആകുമ്പോള്‍ ഓട വൃത്തിയാക്കാറുണ്ട്. പക്ഷേ, പ്രശ്‌നത്തിന് ശാശ്വത പരിഹാരം കാണാന്‍ സാധിച്ചിട്ടില്ല. കലഞ്ഞൂര്‍ ഗ്രാമപഞ്ചായത്തില്‍നിന്നുമുള്ള അവഗണന അവസാനിപ്പിച്ച് മാലിന്യ സംസ്‌കരണത്തിന് ശാശ്വത പരിഹാരം കാണണമെന്നുള്ളതാണ് നാട്ടുകാരുടെ ആവശ്യം.