കണ്ണൂര്: കേരള ലളിത കലാഅക്കാദമിയുടെ നവീനസംരംഭമായ ‘സഞ്ചരിക്കുന്ന ചിത്രശാല’ 6, 7 തിയ്യതികളില് ഇരിക്കൂര് നിയോജകമണ്ഡലത്തില് വിവിധ പ്രദേശങ്ങളില് ചിത്രകലാപ്രദര്ശനം സംഘടിപ്പിക്കും. ആര്ട് ഗ്യാലറികള് ഇല്ലാത്ത ഇടങ്ങളില് ചിത്രപ്രദര്ശനങ്ങള് സംഘടിപ്പിക്കുന്നതിനും കലയെ കൂടുതല് ജനകീയവല്ക്കരിക്കുന്നതിനും വേണ്ടിയാണ് സാംസ്കാരികവകുപ്പും കേരള ലളിതകലാഅക്കാദമിയും ചേര്ന്ന് സഞ്ചരിക്കുന്ന ചിത്രശാല ആരംഭിച്ചത്. കേരളീയചിത്രകലാചരിത്രത്തേയും പാരമ്പര്യത്തേയും കുറിച്ച് ജനങ്ങളില് അവബോധം സൃഷ്ടിക്കുന്നതിനുവേണ്ടിയാണ് പദ്ധതി നടപ്പാക്കുന്നത്. ആധുനികസാങ്കേതികവിദ്യ ഉപയോഗിച്ചാണ് വാഹനത്തില് 50 ലക്ഷത്തോളം ചെലവില് ചിത്രശാല ക്രമീകരിച്ചിട്ടുള്ളത്. പദ്ധതിയുടെ ആദ്യഘട്ടമാണിത്. തുടര്ന്നുള്ള ഘട്ടങ്ങളില് ഇന്ത്യാചരിത്രമുള്പ്പെടെയുള്ള മറ്റു വിഷയങ്ങളുമായി ഗ്രാമഗ്രാമാന്തരം സഞ്ചരിക്കുന്ന ചിത്രശാലയെത്തും.
ചിത്രകാരന്മാരുടെ ക്ഷേമത്തിനായി ‘ചുമരില് ഒരു ചിത്രം’ എന്ന ആശയം മുന്നിര്ത്തി ചിത്രവിപണനവും ലക്ഷ്യമിടുന്നുണ്ട്. ‘ചിത്രങ്ങള് ജനങ്ങളിലേക്ക്’ എന്ന ലക്ഷ്യവുമായി മുന്നേറുന്ന ചിത്രശാലയില് ചിത്രകാരന്മാര്ക്ക് സ്വന്തം സൃഷ്ടികള് പ്രദര്ശിപ്പിക്കാനും വിപണിയിലെത്തിക്കാനും അവസരമുണ്ട്. ചിത്രകലാസ്വാദകര്ക്ക് ചിത്രങ്ങള് കാണുന്നതിനും വാങ്ങുന്നതിനും സൗകര്യമൊരുക്കിയിട്ടുണ്ട്. ചിത്രകലയുടെ പ്രാരംഭ ചരിത്രം മുതല് ആധുനിക കാലഘട്ടം വരെ വിവിധ ഘട്ടങ്ങളായാണ് ആദ്യഘട്ട പ്രദര്ശനം ഒരുക്കിയിട്ടുള്ളത്. പ്രഗത്ഭചിത്രകാരന്മാരുടേയും ശില്പികളുടേയും രചനകളും പ്രദര്ശനത്തിലുണ്ട്. ഗുഹാചിത്രങ്ങളും പുരാതന ചിത്ര-ശില്പ മാതൃകകളും ചുവര്ചിത്രങ്ങളും മുതല് രാജാരവിവര്മ്മ, കെ.സി.എസ്. പണിക്കര്, പത്മിനി, എം.വി.ദേവനുള്പ്പെടെ മണ്മറഞ്ഞവരുടെ സൃഷ്ടികളും ആധുനികകലാകാരന്മാരുടെ രചനകളും പ്രദര്ശനത്തിലുള്പ്പെടുന്നു. നാളെ രാവിലെ 9 ന് ചെമ്പന്തൊടി, 11 ന് നടുവില് ബസ്സ്റ്റാന്റ്, 1 ന് കരുവന് ചാന്, 2.30 ന് ആലക്കാട്, 4 ന് തേര്ത്തല്ലി എന്നിവിടങ്ങളില് ചിത്ര പ്രദര്ശനം നടക്കും. 7 ന് രാവിലെ 9 മണിക്ക് പയ്യാവൂര് ടൗണ്, 11 ന് പൈസക്കരി, 2ന് ഉളിക്കല്, 3.30ന് ഇരിക്കൂര്, 5ന് ശ്രീകണ്ഠപുരം ബസ്സ്റ്റാന്റ്.
