കറുകച്ചാല് : ചങ്ങനാശ്ശേരി താലൂക്കിന്റെ കിഴക്കന് പ്രദേശമായ മാടപ്പള്ളി കറുകച്ചാല്, നെടുംകുന്നം എന്നീ പഞ്ചായത്തുകളില് കുന്നിടിച്ച് മണ്ണെടുത്ത പ്രദേശങ്ങള് കുടിവെള്ള ക്ഷാമത്തിലേക്ക് നീങ്ങുന്നു.
മാടപ്പള്ളി പഞ്ചായത്തിലെ വെങ്കോട്ട, കുട്ടഞ്ചിറ, ഹരിജന് കോളനി, കുറുമ്പനാടം, പാലമറ്റം, മുതലപ്ര എന്നീ പ്രദേശങ്ങളിലും കറുകച്ചാല് പഞ്ചായത്തിലെ മാമുണ്ട, പനയമ്പാല ചിറയ്ക്കല്, തുരുത്തിക്കാട്, ശാന്തിപുരം എന്നിവിടങ്ങളിലും നെടുംകുന്നം പഞ്ചായത്തിലെ മാന്തുരുത്തി, ആഴാംചിറ, നെത്തല്ലൂര് എന്നീ പ്രദേശങ്ങളിലും കുടിവെള്ള ക്ഷാമം തുടങ്ങി. ഈ പ്രദേശങ്ങളിലെല്ലാം പ്രധാന കുന്നുകള് മണ്ണെടുത്തു നിരപ്പാക്കി. ഇപ്പോള് നേരത്തെ തന്നെ കുടിവെള്ളത്തിനു ക്ഷാമമായി തുടങ്ങി. തണ്ണീര്തടങ്ങളും കുളങ്ങളും വറ്റി വരണ്ടു തുടങ്ങി. പല ഭാഗത്തെയും നിലങ്ങളും മണ്ണിട്ടു നികത്തികൊണ്ടിരിക്കുകയാണ്. പനയമ്പാലത്തോടിന്റെ പല ഭാഗങ്ങളും സ്വകാര്യ വ്യക്തികള് കൈയേറി മണ്ണിട്ടു നികത്തി സ്വന്തമാക്കി. ഇതോടെ പനയമ്പാല ത്തോടിന്റെ വീതിയും കുറഞ്ഞു. കുടിവെള്ള ക്ഷാമം ആരംഭിച്ചെങ്കിലും പ്രദേശത്തെ മണ്ണെടുപ്പ് തുടര്ന്ന് കൊണ്ടിരിക്കുന്നു. അധികൃതര് അനധികൃത മണ്ണെടുപ്പ് അറിഞ്ഞഭാവമില്ല.മലകള് ഓരോന്നായി നിരന്നിട്ടും അടുത്ത മലകള് നികത്താന് മണ്ണു മാഫിയകള് മുന്നോട്ടു പോകുകയാണ്.
കറുകച്ചാല്, മാടപ്പള്ളി, വാകത്താനം പഞ്ചായത്തുകളിലേക്ക് കുടിവെള്ള പൈപ്പുകള് ഉണ്ടെങ്കിലും വെള്ളം എത്താറില്ല. കറുകച്ചാല് ഭാഗത്ത് വെള്ളമെത്തിയിട്ട് മാസങ്ങളായി. ഇപ്പോള് പലരും വെള്ളം വിലക്കു വാങ്ങുകയാണ്. ഇങ്ങനെ കൊണ്ടുവരുന്ന വെള്ളത്തിന്റെ ഗുണനിലവാരം പരിശോധിക്കാറില്ല.
കുളങ്ങളും തോടുകളും വറ്റിയെങ്കിലും കുടിവെള്ള വിതരണം തടസ്സംകൂടാതെ എത്തിക്കുവാനുള്ള നടപടി വാട്ടര് അതോറിറ്റി സ്വീകരിക്കണമെന്നാണ് പ്രദേശ വാസികള് പറയുന്നത്.
