കണ്ണൂര്: സോളാര് കേസിലെ കമ്മീഷന് മുന്നില് മുഖ്യമന്ത്രി ഉമ്മന്ചാണ്ടിക്കെതിരെ സരിത നല്കിയ മൊഴിയുടെ അടിസ്ഥാനത്തില് മുഖ്യമന്ത്രി രാജിവെയ്ക്കണമെന്നാവശ്യപ്പെട്ട് യുവമോര്ച്ച ജില്ലാ കമ്മിറ്റിയുടെ ആഭിമുഖ്യത്തില് കണ്ണൂര് കലക്ടേറ്റിലേക്ക് ഇന്നലെ മാര്ച്ച് നടത്തി. മാര്ച്ച് കലക്ട്രേറ്റിന്റെ മുഖ്യ കവാടത്തില് പോലീസ് തടഞ്ഞു. തുടര്ന്ന് യുവോര്ച്ച സംസ്ഥാന വൈസ് പ്രസിഡണ്ട് ബിജു ഏളക്കുഴി മാര്ച്ച് ഉദ്ഘാടനം ചെയ്തു. സര്വ്വത്ര അഴിമതിയില് മുങ്ങിയ കേരളത്തിലെ യുഡിഎഫ് മന്ത്രിസഭ കേരളത്തിന് ശാപമായി മാറിയിരിക്കുകയാണെന്നും എത്രയും വേഗം മുഖ്യമന്ത്രി ഉമ്മന്ചാണ്ടി രാജിവെച്ച് തെരഞ്ഞെടുപ്പിനെ നേരിടാന് തയ്യാറാകണമെന്നും മാര്ച്ച് ഉദ്ഘാടനം ചെയ്തുകൊണ്ട് ബിജുഏളക്കുഴി പറഞ്ഞു. മന്ത്രിസഭയിലെ ഒട്ടുമിക്ക മന്ത്രിമാരും അഴിമതി ആരോപണവിധേയരാണ്. കേരളത്തിന്റെ ചരിത്രത്തില് ഇത്തരത്തില് ഒരു മന്ത്രിസഭയുണ്ടായിരുന്നിട്ടില്ല. എല്ലാ മന്ത്രിമാരും കൂട്ടത്തോടെ ജയിലിലേക്ക് പോകേണ്ട സ്ഥിതിയാണ്. സോളാര്-ബാര് കോഴ അഴിമതികളിലൂടെ കേരളത്തിലെ സാധാരണക്കാരന്റെ കോടിക്കണക്കിന് രൂപയാണ് സംസ്ഥാന ഖജനാവിന് നഷ്ടമായിട്ടുളളത്. അഴിമതിക്കെതിരെ പൊരുതേണ്ട പ്രതിപക്ഷമായ എല്ഡിഎഫാകട്ടെ അഡ്ജസ്റ്റ്മെന്റ് സമരങ്ങള് നടത്തുകയാണ്. അഴിമതി സര്ക്കാര് രാജിവെയ്ക്കാന് തയ്യാറായില്ലെങ്കില് യുമോര്ച്ച കൂടുതല് ശക്തമായ പ്രക്ഷോഭങ്ങള്ക്ക് വരും ദിവസങ്ങളില് നേതൃത്വം നല്കുമെന്നും അദ്ദേഹം പറഞ്ഞു. യുവമോര്ച്ച ജില്ലാ പ്രസിഡണ്ട് കെ.പി.അരുണ് കുമാര് അധ്യക്ഷത വഹിച്ചു. ജില്ലാ ജനറല് സെക്രട്ടറി ബിജുതുത്തി സ്വാഗതം പറഞ്ഞു. ജില്ലാ വൈസ് പ്രസിഡണ്ട് സി.സി.രതീഷ്ജനറല് സെക്രട്ടറി കെ.സി.ജിയേഷ് തുടങ്ങിയവര് മാര്ച്ചിന് നേതൃത്വം നല്കി.
