വെല്ലിങ്ടണ്: പാക്കിസ്ഥാനെതിരായ ആദ്യ ഏകദിനം ന്യൂസിലാന്ഡിന്. 70 റണ്സിനാണ് കിവികള് വിജയം കൊത്തിയെടുത്തത്. ആദ്യം ബാറ്റ് ചെയ്ത ന്യൂസിലാന്ഡ് 8 വിക്കറ്റിന് 280 റണ്സ് അടിച്ചുകൂട്ടി. മറുപടി ബാറ്റിങ്ങിനിറങ്ങിയ പാക്കിസ്ഥാന് 46 ഓവറില് 210 റണ്സിന് ഓള് ഔട്ടായി. ഹെന്റി നിക്കോള്സ് മാന് ഓഫ് ദി മാച്ച്. ഇതോടെ മൂന്ന് മത്സരങ്ങളുടെ പരമ്പരയില് ന്യൂസിലാന്ഡ് 1-0ന് മുന്നിലെത്തി.
എന്നാല് മത്സരത്തിനിടെ മിച്ചല് മക്ലഗന് പരിക്കേറ്റത് കിവികള്ക്ക് തിരിച്ചടിയായി. അന്വര് അലി എറിഞ്ഞ അവസാന ഓവറിലെ അഞ്ചാം പന്ത് ഹുക്ക് ചെയ്യാന് ശ്രമിക്കുന്നതിടെ പന്ത് ഹെല്മറ്റിനുള്ളിലൂടെ കണ്ണില് കൊള്ളുകയായിരുന്നു. നിലത്തുവീണ മക്ലഗനെ ആശുപത്രിയില് പ്രവേശിപ്പിച്ചശേഷം ചികിത്സക്ക് വിധേയനാക്കി. പത്താമനായി ക്രീസിലെത്തിയ മക്ലഗന് 18 പന്തില് മൂന്ന് ഫോറും രണ്ടും സിക്സറും പറത്തി 31 റണ്സോടെ ബാറ്റ് ചെയ്യുമ്പോഴാണ് ഏറുകൊണ്ടത്. പിന്നീട് ബൗള് ചെയ്യാന് മക്ലഗന് ഇറങ്ങിയതുമില്ല.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ കിവികളുടെ തുടക്കം തകര്ച്ചയോടെയായിരുന്നു. സ്കോര് 99-ല് എത്തിയപ്പോഴേക്കും അഞ്ച് മുന്നിര വിക്കറ്റുകളാണ് വീണത്. മാര്ട്ടിന് ഗുപ്റ്റില് (11), ലാഥം (11), കെയ്ന് വില്ല്യംസണ് (10), എലിയറ്റ് (0), കോറി ആന്ഡേഴ്സണ് (10) എന്നിവരാണ് മടങ്ങിയത്. അന്വര് അലിയുടെയും മുഹമ്മദ് ഇര്ഫാന്റെയും മികച്ച ബൗളിങാണ് കിവി മുന്നിരയെ തകര്ത്തെറിഞ്ഞത്. ഏഴാം വിക്കറ്റില് ഹെന്റി നിക്കോള്സിനൊപ്പം സാന്റ്നര് ഒത്തുചേര്ന്നതോടെയാണ് കിവി ഇന്നിങ്സിന് ജീവന്വച്ചത്. 79 റണ്സാണ് ഇരുവരും കൂട്ടിച്ചേര്ത്തത്. സ്കോര് 178-ല് എത്തിയപ്പോള് 48 റണ്സെടുത്ത സാന്റ്നര് മടങ്ങി. അധികം വൈകാതെ ടോപ്സ്കോറര് നിക്കോള്സും മടങ്ങി. 82 റണ്സെടുത്ത നിക്കോള്സിന്റെ ഇന്നിങ്സില് 7 ബൗണ്ടറികള് ഉള്പ്പെട്ടു. പിന്നീട് മാറ്റ് ഹെന്റിയും (30 പന്തില് 48), മിച്ചല് മക്ലഗനും (18 പന്തില് പുറത്താകാതെ 31) ചേര്ന്നാണ് സ്കോര് 280-ല് എത്തിച്ചത്. പാക്കിസ്ഥാന് വേണ്ടി അന്വര് അലിയും മുഹമ്മദ് ആമിറും മൂന്നും മുഹമ്മദ് ഇര്ഫാന് രണ്ടും വിക്കറ്റുകള് വീഴ്ത്തി.
281 റണ്സിന്റെ വിജയലക്ഷ്യത്തെ പിന്തുടര്ന്ന് മറുപടി ബാറ്റിങ്ങിനിറങ്ങിയ പാക്കിസ്ഥാന്റെ തുടക്കവും തകര്ച്ചയോടെ. സ്കോര് ബോര്ഡില് 37 റണ്സായപ്പോഴേക്കും ഓപ്പണര്മാരായ അസ്ഹര് അലി (19)യെയും അഹമ്മദ് ഷെഹ്സാദിനെയും (19) നഷ്ടപ്പെട്ടു. തുടര്ന്ന് മുഹമ്മദ് ഹഫീസും ബാബര് അസമും ചേര്ന്ന് സ്കോര് 118-ല് എത്തിച്ചെങ്കിലും 42 റണ്സെടുത്ത ഹഫീസിനെ മടക്കി വില്ല്യംസണ് ഈ കൂട്ടുകെട്ട് പൊളിച്ചു. പിന്നീടെത്തിയവരില് സര്ഫ്രാസ് അഹമ്മദ് (30) മാത്രമാണ് ഭേദപ്പെട്ട പ്രകടനം നടത്തിയത്. നാല് വിക്കറ്റുകള് വീഴ്ത്തിയ ട്രെന്റ് ബൗള്ട്ടും മൂന്നെണ്ണം സ്വന്തമാക്കിയ എലിയറ്റുമാണ് പാക്കിസ്ഥാനെ തകര്ക്കുന്നതില് നിര്ണായക പങ്കുവഹിച്ചത്.
