ശാസ്ത്രവിഷയങ്ങളില് ഏറെ താല്പര്യം പ്രകടിപ്പിച്ച സദാശിവ ശേണായി തന്ത്ര-ശാസ്ത്രവിധികളോടെ ധര്മ്മപീഠാധിപതി ഗുരുപരമ്പരയുടെ താപസനായി മാറി. മെട്രിക്കുലേഷന് പഠിക്കുമ്പോള് ഭൗതിക-രസതന്ത്രശാസ്ത്രാനുബന്ധ വിഷയങ്ങളില് ഉന്നതശ്രേണി വിജയം കൈവരിച്ചിരുന്നു. സ്കൂള് വിദ്യാഭ്യാസത്തിനുശേഷം എറണാകുളം മഹാരാജാസ് കോളേജില് മെട്രിക്കുലേഷനില് ശാസ്ത്രവിഷയമാണ് ഐഛികമായി എടുത്തത്. ആദ്യവര്ഷം തന്നെ പ്രഥമശ്രേണിയിലായിരുന്നു വിജയം. രണ്ടാം വര്ഷ പഠനത്തിനിടയിലാണ് സമാജത്തിന്റെ ധര്മ്മപീഠ ഉത്തരാധികാരിയായുള്ള നിയോഗം ലഭിച്ചത്. ആഗ്രഹത്തെ വിധി പരാജയപ്പെടുത്തിയപ്പോള് സദാശിവ ശേണായി സന്ന്യാസാശ്രമ താപസനായി അവരോധിതനാകുകയും ചെയ്തു.
ആത്മീയ-പുരാണവിഷയങ്ങളുടെ പഠനങ്ങള്ക്കൊപ്പം ശാസ്ത്രാനുബന്ധ വിശകലനങ്ങളും വിഛേദങ്ങളുമായി ശാസ്ത്രാഭിമുഖ്യത്തില് വിഷയഗ്രഹണത്തിന് സ്വാമികള് ശ്രമിക്കുകയും ചെയ്തു. സമാജിക മാര്ഗ്ഗദര്ശന പ്രഭാഷണങ്ങളില് ശരിയായ ദിശാബോധം വളര്ത്തുവാനും സുധീന്ദ്രതീര്ത്ഥ സ്വാമികള് ശ്രദ്ധിക്കുകയും ചെയ്തിരുന്നു. ആധുനിക കാലഘട്ടത്തിലും സന്ധ്യാവന്ദനം, കുടുംബബന്ധങ്ങള്, സമൂഹപ്രാര്ത്ഥന, ഈശ്വരസേവ, ദരിദ്രജനസഹായം, വൃദ്ധജന പരിപാലനം തുടങ്ങിയവയില് സമാജശിഷ്യരില് പ്രതിഫലനങ്ങളെ തിരിച്ചറിയുവാനും, പരിഹാരനിര്ദ്ദേശങ്ങള് പകരാനും ആത്മീയഗുരു ശ്രദ്ധിച്ചിരുന്നു. ജീവിതശാസ്ത്രവിഷയങ്ങളില്നിന്ന് ആത്മജ്ഞാനത്തിന്റെ ‘ശാസ്ത്രീയത’യെ കടഞ്ഞെടുത്തുള്ള ദര്ശനങ്ങളായിരുന്നു സ്വാമിജിയുടേത്.
