തിരുവനന്തപുരം: 56-ാമത് സംസ്ഥാന സ്കൂള് കലോത്സവത്തിന് തുടക്കം കുറിച്ചുകൊണ്ടുള്ള വര്ണ്ണാഭമായ ഘോഷയാത്രയില് 10,000 ത്തോളം വിദ്യാര്ത്ഥികള് പങ്കെടുക്കും. 19ന് ഉച്ചയ്ക്ക് 2.30ന് ഗവ. സംസ്കൃത കോളേജിന് മുന്നില് ഡിജിപി ടി.പി. സെന്കുമാര് ഫഌഗ് ഓഫ് ചെയ്യും.
ഘോഷയാത്ര പ്രധാനവേദിയായ പുത്തരിക്കണ്ടം മൈതാനത്തില് എത്തിച്ചേരുമ്പോഴാണ് ഏഷ്യയിലെ ഏറ്റവും വലിയ ഈ കലാമാമാങ്കത്തിന് കേരളാ മുഖ്യമന്ത്രി ഉമ്മന്ചാണ്ടി തിരിതെളിയിക്കുന്നത്. ഘോഷയാത്രയില് മന്ത്രിമാര്, എംഎല്എമാര്, വിവിധ ജനനേതാക്കള്, സാംസ്കാരിക നായകന്മാര് എന്നിവര് പങ്കെടുക്കുന്നു. ഏകദേശം 35 ഓളം സ്കൂളുകള് ഘോഷയാത്രയില് പങ്കെടുക്കുന്നു. ഘോഷയാത്രയില് ഏറ്റവും മനോഹരമായി കലാരൂപങ്ങള് അവതരിപ്പിക്കുന്ന ഗവണ്മെന്റ് എയ്ഡഡ് സ്കൂളുകളെ ഒരു വിഭാഗമായും അണ് എയിഡഡ് സ്കൂളുകളെ മറ്റൊരു വിഭാഗമായും തിരിച്ച് ഒന്ന്, രണ്ട്, മൂന്ന് സ്ഥാനക്കാര്ക്ക് ട്രോഫികള് പ്രധാന വേദിയില് വച്ച് വിതരണം ചെയ്യും. ഘോഷയാത്രയില് പങ്കെടുക്കുന്ന കുട്ടികള്ക്ക് യൂണിവേഴ്സിറ്റി കോളേജ് പരിസരത്തുവച്ച് ശ്രീമൂലംക്ലബ്ബും, മില്മ നല്കുന്ന ചോക്ലേറ്റും സെക്രട്ടേറിയറ്റിനു മുമ്പില് വച്ച് ലയണ്സ് ക്ലബും, എസ്.എം.വി. സ്കൂളിനടുത്തുവച്ച് ട്രിവാന്ഡ്രം ക്ലബും പുത്തരിക്കണ്ടം മൈതാനത്തിനടുത്തുവച്ച് വ്യാപാരി വ്യവസായി സമിതി ജില്ലാ പ്രസിഡന്റ് പാപ്പച്ചന്റെ നേതൃത്വത്തിലുള്ള വ്യാപാരികളും ദാഹജലവും ലഘുഭക്ഷണവും വിതരണം ചെയ്യും. ഘോഷയാത്രയില് മരക്കാര് മോട്ടോഴ്സിന്റെ നേതൃത്വത്തില് കേരളത്തിലെ ആദ്യത്തെ പ്രായം കുറഞ്ഞ മോട്ടോര് സ്പോര്ട്ട്സ് വനിതാ ഡ്രൈവറായ കുമാരി ആതിരാ മുരളി മിന്നുന്ന പ്രകടനം കാഴ്ചവയ്ക്കുന്നു. തിരുവനന്തപുരം പള്ളിച്ചല് റീജിയണല് ഇന്സ്റ്റിറ്റിയൂട്ട് ഓഫ് എഞ്ചിനീയറിംഗില് മെക്കാനിക്കല് എഞ്ചിനീയറിംഗ് വിദ്യാര്ത്ഥിനിയാണ് ആതിര. തുടര്ന്ന് 56 ബുള്ളറ്റ് മോട്ടോര് ബൈക്കുകളുടെ സാഹസിക പ്രകടനം, 56 മുത്തുക്കുടകള് ചൂടിയ വിദ്യാര്ത്ഥിനികള്, സൈക്ലിംഗ്, റോളര് സ്കേറ്റിംഗ്, പോലീസ് അശ്വാരൂഡ സേന, ബാന്റ് മേളം, മാര്ഷ്യല് ആര്ട്സ് പ്രകടനം, വിവിധ കലാരൂപങ്ങള്, സാംസ്കാരിക പൈതൃകം പേറുന്ന നിശ്ചല ദൃശ്യങ്ങള് എന്നിവയും ഏകദേശം 1500ല് അധികം വരുന്ന സ്കൗട്ട് ആന്റ് ഗൈഡ്സും, എന്സിസി കേഡറ്റുകളും ഘോഷയാത്രയില് ഉണ്ടാകും. വിവിധ സര്ക്കാര് ഏജന്സികളുടെ ഫ്ളോട്ടുകളും, റസിഡന്റ്സ് അസോസിയേഷനുകള്, വിവിധ സാംസ്കാരിക സംഘടനകള് ആര്ട്സ് ആന്റ് സ്പോര്ട്സ് ക്ലബുകള്, വ്യാപാരി വ്യവസായികള് എന്നിവരുടെ വിവിധ കലാരൂപങ്ങളും ഉള്പ്പെടുത്തിയുള്ള ഘോഷയാത്രയാണ് ഉണ്ടാകുക.
