തിരുവനന്തപുരം: നാട്ടുവൈദ്യന്മാരുടെയും അദിവാസികളുടെയും കൈയിലുള്ള നാട്ടുവൈദ്യവും നാട്ടറിവുകളും പച്ചമരുന്നകളുടെ ഔഷധഗുണങ്ങളും കൈമോശം വരാതിരിക്കാനും സംരക്ഷിക്കാനും ഭാരതീയ നാട്ടുവൈദ്യ സമിതി മുന്കൈയെടുക്കണമെന്ന് തിരുവിതാംകൂര് രാജകുടുംബാംഗം പൂയം തിരുനാള് ഗൗരി പാര്വതീബായി പറഞ്ഞു. ഭാരതീയ നാട്ടുവൈദ്യ സമിതിയുടെ വാര്ഷികാഘോഷം വിജെടി ഹാളില് ഉദ്ഘാടനം ചെയ്യുകയായിരുന്നു അവര്.
നാട്ടുവൈദ്യ ചികിത്സാരംഗത്ത് ഹൃദ്രോഗത്തിന് മരുന്നുണ്ടെന്ന് അവകാശപ്പെടുന്ന പന്നിയോട് സുകുമാരന്വൈദ്യന് നാട്ടുവൈദ്യത്തെക്കുറിച്ച് യുവാക്കളെ ബോധവത്കരിക്കണമെന്ന് ആവശ്യപ്പെട്ടു. യാതൊരു ലാബുകളുടെയും സഹായത്തോടെയല്ല ഈ മരുന്നുകളുടെ നിര്മാണമെന്നു പറഞ്ഞ അദ്ദേഹം തന്റെ അടുക്കല് വന്ന എല്ലാ ഹൃദ്രോഗികളെയും ചികിത്സിച്ച് ഭേദമാക്കാനായെന്ന് അവകാശപ്പെട്ടു. ഓരോ സ്കൂളില്നിന്ന് ഈ വിഷയത്തില് താത്പര്യമുള്ള പത്തു കുട്ടികള്ക്കെങ്കിലും നാട്ടുവൈദ്യത്തിന്റെ പ്രധാന്യം ബോദ്ധ്യപ്പെടുത്തി ഔഷധസസ്യങ്ങള് നട്ടു പിടിപ്പിക്കാന് പരിശീലിപ്പിക്കണമെന്നും അദ്ദേഹം പറഞ്ഞു. സമിതി സംസ്ഥാന പ്രസിഡന്റ് പ്രമേദ്, സമിതി ദേശീയസെക്രട്ടറി ഡോ. ജോണ് ക്രിസ്റ്റഫര്, സജിത്ത് വൈദ്യന് എന്നിവര് സംസാരിച്ചു.
വൈകീട്ട് നടന്ന സമാപനസമ്മേളനം മന്ത്രി വി.എസ്. ശിവകുമാര് ഉദ്ഘാടനം ചെയ്തു. ആരോഗ്യരംഗത്തെ വെല്ലുവിളികള് നേരിടാന് നാട്ടുചികത്സകര് മുന്കൈയെടുക്കണമെന്നും ആയുഷ് പോളിസിയില് നാട്ടുവൈദ്യരുടെ പ്രശ്നങ്ങള്ക്കു പരിഹാരം കാണാന് ശ്രമിക്കുമെന്നും അദ്ദേഹം പറഞ്ഞു. സ്വാമിത്തോപ്പ് വൈകുണ്ഠസ്വാമിമഠാധിപതി ബാലപ്രജാപതി അടികളാര് അധ്യക്ഷത വഹിച്ചു. ബിജെപി സംസ്ഥാന അധ്യക്ഷന് അഡ്വ എസ്. സുരേഷ്, ഏകലവ്യശ്രമം മഠാധിപതി സ്വാമി അശ്വതിതിരുനാള്, ശിവസേന സംസ്ഥാന പ്രസിഡന്റ് എം. എസ്. ഭുവനചന്ദ്രന്, എസ്എന്ഡിപിയോഗം നേതാവ് ചൂഴാല് നിര്മലാനന്ദന് തുടങ്ങിയവര് സംസാരിച്ചു.
മര്മ ചികിത്സാ ബോധവത്കരണവും പ്രയോഗങ്ങളുടെ പ്രദര്ശനവും ഔഷധ സസ്യ ബോധവത്കരണവും ഇതോടനുബന്ധിച്ച് സംഘടിപ്പിച്ചു.
