കൊച്ചി: പാര്‍ലമെന്റില്‍ സഭാസ്തംഭനം നടക്കുന്നത് നിയമലംഘനമാണെന്ന് ജസ്റ്റിസ് പി.എസ്. ഗോപിനാഥ്. ‘നാഷണല്‍ ഹെറാള്‍ഡ്-പാര്‍ലമെന്റ് സ്തംഭനം’ എന്ന വിഷയത്തില്‍ വിജില്‍ ഹ്യൂമന്‍ റൈറ്റ്‌സ് സംഘടിപ്പിച്ച ചര്‍ച്ചാ സായാഹ്നത്തില്‍ സംസാരിക്കുകയായിരുന്നു അദ്ദേഹം. കൊല്ലത്ത് ആര്.ശങ്കര്‍ പ്രതിമ ഉദ്ഘാടനം ചെയ്ത പ്രശ്‌നവും സഭാസ്തംഭനത്തിന് കാരണമായി. പ്രതിമ ഉദ്ഘാടനത്തിന് ആര് പങ്കെടുക്കണമെന്നത് സംഘാടകര്‍ തീരുമാനിക്കേണ്ടതാണ്. ജോലി ചെയ്തില്ലെങ്കിലും സാമാജികര്‍ക്ക് ശമ്പളം ലഭിക്കുന്നുവെന്ന് ജസ്റ്റിസ് പറഞ്ഞു.
നാഷണല്‍ ഹെറാള്‍ഡ് വിഷയത്തില്‍ മോദി സര്‍ക്കാരിന് എന്ത് പങ്കാണുള്ളതെന്ന് മനസ്സിലാകുന്നില്ലെന്ന് ഡോ.സെബാസ്റ്റ്യന്‍ പോള്‍ പറഞ്ഞു. പത്രം നിന്നുപോയാല്‍ അതിന്റെ സ്വത്തെല്ലാം നെഹ്‌റു കുടുംബത്തിന്റേതാകുമെന്നത് അപഹാസ്യമാണ്. ‘വീക്ഷണം’ നിന്നുപോയാല്‍ അതിന്റെ സ്വത്ത് എ.കെ. ആന്റണിയുടെ കുടുംബത്തിന് ലഭിക്കില്ലല്ലോ. നിസ്സാരമായ കാര്യങ്ങള്‍ക്കുപോലും സഭാസ്തംഭനം നടക്കുന്നു. സഭയില്‍ വിഷയം പഠിച്ച് അവതരിപ്പിച്ചാല്‍ അത് വാര്‍ത്തയല്ല. കുഴപ്പക്കാര്‍ ജനങ്ങളുടെ മുന്നില്‍ ഹീറോകളാകുന്നു. ചെറിയ കക്ഷികള്‍ പോലും ബഹളത്തിലൂടെ സാന്നിദ്ധ്യമറിയിക്കുന്നുവെന്നും അദ്ദേഹം ചൂണ്ടിക്കാട്ടി. വിജില്‍ സംസ്ഥാന സെക്രട്ടറി അഡ്വ.സി.സി. എബ്രഹാം, അഡ്വ.പി.എസ്. ശ്രീധരന്‍ പിള്ള എന്നിവര്‍ സംസാരിച്ചു. ടി.സതീശന്‍ സ്വാഗതവും ബി.പ്രകാശ് ബാബു നന്ദിയും പറഞ്ഞു.
