പത്തനംതിട്ട: ഗര്ഭിണിയായ യുവതിയെയും ഭര്ത്താവിനെയും വഴിതടഞ്ഞ് സദാചാര ഗുണ്ടകള് ചമഞ്ഞ് ആക്രമിച്ച ആറംഗ സംഘംഅറസ്റ്റില്.
കലഞ്ഞൂര് പുത്തന്വീട്ടില് വില്ലി സാം തോമസ് (25), സിബിഭവനില് സിബി വര്ഗീസ് ( 25), സിജോ വര്ഗീസ് (19), വേങ്ങവിള പുത്തന്വീട്ടില് ജിബിന് ചാക്കോ (21) , കൊല്ലംപറമ്പില് കെ.ജി. നിതിന് (21) , മംഗലശേരില് ശരത് എസ്.നായര് (20) എന്നിവരാണ് അറസ്റ്റിലായത്. ഇവര് എന്ജിനീയറിംഗ്, ബിരുദ വിദ്യാര്ഥികളാണെന്നു പോലീസ് പറഞ്ഞു.
കഴിഞ്ഞ ഡിസംബര് 22നായിരുന്നു ദമ്പതികളെ ആക്രമിച്ച സംഭവം. ഡല്ഹിയില് നഴ്സായ യുവതിയുടെ റാന്നിയിലെ വീട്ടില് നിന്നും ഭര്ത്തൃഗൃഹമായ ചണ്ണപ്പേട്ടയിലേക്കു പോകുമ്പോള് കലഞ്ഞൂര് ഒന്നാംകുറ്റി ഭാഗത്ത് കാര് നിര്ത്തി വിശ്രമിക്കുന്നതിനിടെയാണ ്പിന്നാലെ മാരുതിക്കാറിലെത്തിയ സംഘം കാര് നിര്ത്തി ദമ്പതികളെ ഉപദ്രവിക്കാന് ശ്രമിച്ചത്. ഭാര്യയും ഭര്ത്താവുമാണെന്നു പറഞ്ഞിട്ടും ഉപദ്രവിക്കാന് ശ്രമിച്ചപ്പോഴുണ്ടായ ബഹളത്തിനിടെ ആളുകള് ഓടിക്കൂടിയപ്പോള് സംഘം രക്ഷപെട്ടു. പത്തനാപുരം ചെമ്മംപാലം ജംഗ്ഷനിലെത്തിയപ്പോള് പ്രതികള് വീണ്ടും ദമ്പതികള് സഞ്ചരിച്ചിരുന്ന കാര് തടഞ്ഞുനിര്ത്തുകയും ഭര്ത്താവിനെ ക്രൂരമായി ഉപദ്രവിക്കുകയും യുവതിയുടെ ചുരിദാര്ഷാള് വലിച്ചുകീറുകയും അസഭ്യം പറഞ്ഞു ഉപദ്രവിക്കാന് ശ്രമിച്ചുവെന്നുമാണ് പരാതി. പത്തനാപുരം പോലീസ് രജിസ്റ്റര് ചെയ്ത കേസിലെ പ്രതികള് പത്തനംതിട്ട ജില്ലാ സെഷന്സ് കോടതിയില് മുന്കൂര് ജാമ്യത്തിനു ശ്രമിച്ചിരുന്നു. ജില്ലാ സെഷന്സ് ജഡ്ജി പി.സോമരാജന് കഴിഞ്ഞദിവസം മുന്കൂര് ജാമ്യാപേക്ഷ തള്ളിയതോടെയാണ് ഇന്നലെ ഇവരെ കൂടല് പോലീസ് അറസ്റ്റ് ചെയ്തത്.
