സ്കൂള് കലോത്സവ ചരിത്രത്തില് തന്നെ പുതിയ ചരിത്രം കുറിക്കുകയാണ് ഭക്ഷണകമ്മിറ്റി. കലോത്സവത്തിനെത്തിയവര് ക്യൂ നിന്ന് കഷ്ടപ്പെടുന്ന കാഴ്ചയാണ് കലോത്സവ ഭക്ഷണപന്തലിന് സമീപം കാണാറുള്ളത്. എന്നാല് കൊയിലാണ്ടിയിലെ ഭക്ഷണപന്തലില് എത്തിയാല് അതു കാണില്ല. ഭക്ഷണകമ്മിറ്റിയുടെ പ്രധാന മുദ്രാവാക്യം തന്നെ ക്യൂ നില്ക്കാതെ ഭക്ഷണം കഴിക്കാം എന്നതാണ്. ഒരേ സമയം ആയിരം പേര്ക്ക് ഭക്ഷണം കഴിക്കാനുള്ള സൗകര്യമാണ് ഭക്ഷണപന്തലില് ഒരുക്കിയിരിക്കുന്നത്. ഇന്നലെ ഉച്ചയ്ക്ക് മാത്രം പതിനായിരത്തിലധികം പേരാണ് ഭക്ഷണം കഴിക്കാനെത്തിയത്. ആര്ക്കും ഒരു ബുദ്ധിമുട്ടും ഉണ്ടായില്ല.
എന്ടിയുവിനാണ് ഭക്ഷണകമ്മിറ്റിയുടെ ചുമതല. ഉണ്ണികൃഷ്ണന് ആയഞ്ചേരി, രമേശന് ആയഞ്ചേരി എന്നിവരുടെ നേതൃത്വത്തില് 20 അംഗ സംഘമാണ് ഭക്ഷണം തയ്യാറാക്കുന്നത്. അദ്ധ്യാപകര്, എന്എസ്എസ് വളണ്ടിയര്മാര്, സേവാഭാരതി പ്രവര്ത്തകര്, എബിവിപി പ്രവര്ത്തകര്, പിടിഎ അംഗങ്ങള്, എംപിടിഎ അംഗങ്ങള് എന്നിവരെല്ലാം സജീവമായി കാര്യങ്ങള് എറ്റെടുത്തു നടത്തുന്നു. എല്ലാദിവസവും പായസം ഉണ്ടെങ്കിലും പുതുവര്ഷത്തില് ഉച്ചഭക്ഷണത്തിനെത്തുന്നവര്ക്ക് സ്പെഷ്യല് പായസം നല്കാനാണ് ഭക്ഷണകമ്മിറ്റിയുടെ തീരുമാനം.
കൊയിലാണ്ടി നഗരസഭാ സ്റ്റാന്റിംഗ് കമ്മിറ്റി ചെയര്മാന് വി. സുന്ദരന് ചെയര്മാനും സി. ബൈജു കണ്വീനറുമായ കമ്മിറ്റിയാണ് ഭക്ഷണകമ്മിറ്റിയുടെ നേതൃത്വം വഹിക്കുന്നത്.
എഇഒ ജവഹര് മനോഹര്, ടി.എ. നാരായണന് , കെ.എം. രാധാകൃഷ്ണന്, ടി. ദേവദാസ്, ടി.പി. ജയചന്ദ്രന് , അനൂപ് കുമാര്, ടി.കെ. പ്രമോദ്കുമാര്, അരവിന്ദന്, മുരളി, ഗോപന്കുമാര് എന്നിവര് മുഴുവന് സമയവും ഭക്ഷണ പന്തലില് സജീവമാണ്.
