പത്തനംതിട്ട: അച്ചന്‍കോവിലാറ്റിന്റെ അക്കരയും ഇക്കരയുമായി രണ്ട് ദിവസത്തിനുള്ളില്‍ പൊലിഞ്ഞത് നാലു ജീവന്‍. തുടര്‍ച്ചയായുണ്ടായ അപകടം നദീതീരവാസികളെ ദു:ഖാകുലരാക്കി. തിങ്കളാഴ്ച രാവിലെ കൊല്ലത്തുനിന്നുള്ള രണ്ട് ശബരിമല തീര്‍ത്ഥാടകര്‍ അച്ചന്‍കോവിലാറ്റിലെ ആറാട്ട് കടവിന് സമീപം മുങ്ങിമരിച്ചിരുന്നു.കൊട്ടിയം കണ്ണനല്ലൂര്‍ സ്വദേശി ശാന്താറാമും ചാത്തന്നൂര്‍ താഴംതെക്ക് സ്വദേശി സുരേഷ് ബാബുവുമാണ് ശബരിമലയിലേക്ക് നടന്നുപോകുന്നതിനിടെ കുളിക്കാനിറങ്ങിയപ്പോള്‍ കയത്തില്‍പെട്ട് മരിച്ചത്.
ആറാട്ട് കടവിന്റെ എതിര്‍വശത്തെ 500 മീറ്ററോളം മാറി കുരുമ്പേലിക്കടവില്‍ ഇന്നലെ ഉച്ചയോടെ പ്ലസ് ടു വിദ്യാര്‍ത്ഥികളായ രണ്ട് പേര്‍ മുങ്ങിമരിച്ചു. കൂട്ടുകാരൊന്നിച്ച് കുളിക്കാനിറങ്ങവേയാണ് ഇവരും അപകടത്തില്‍പെട്ടത്. തുടര്‍ച്ചയായുണ്ടാകുന്ന അപകടങ്ങള്‍ നാട്ടുകാരെ ഭയാശങ്കയുള്ളവരാക്കുന്നു. ഏതാനും ദിവസം മുമ്പാണ് കൈപ്പട്ടൂര്‍ പാലത്തിന് സമീപത്തെ വലിയ വളവില്‍ ശബരിമല തീര്‍ത്ഥാടകര്‍ സഞ്ചരിച്ചിരുന്ന രണ്ട് ഓട്ടോറിക്ഷകളില്‍ ടിപ്പര്‍ ലോറി ഇടിച്ച് തീര്‍ത്ഥാടകര്‍ക്ക് സാരമായി പരിക്കേറ്റത്. അതിനും രണ്ടാഴ്ച മുമ്പ് ഓമല്ലൂര്‍ മാര്‍ക്കറ്റ് ജംഗ്ഷന് സമീപം ശബരിമല തീര്‍ത്ഥാടകര്‍ സഞ്ചരിച്ചിരുന്ന കാര്‍ അപകടത്തില്‍പെട്ട് തീര്‍ത്ഥാടകര്‍ക്ക് പരിക്കേറ്റിരുന്നു.
പ്രതികരിക്കാൻ ഇവിടെ എഴുതുക: