കാലടി: പ്രസിദ്ധ ഭരതനാട്യ ദമ്പതികളായ ചെന്നൈ രഞ്ജിത്തും വിജ്‌നയുടെയും ഭരതനാട്യ വിസ്മയം ഏഴാമത് ദേശീയ ശ്രീശങ്കര നൃത്ത സംഗീതോത്സവത്തിന്റെ രണ്ടാം ദിവസത്തെ ധന്യമാക്കി. ഒന്നരമണിക്കൂര്‍ നീണ്ടുനിന്ന രഞ്ജിത് വിജ്‌ന ദമ്പതിമാരുടെ കച്ചേരി സമ്പ്രദായത്തിലെ ഭരതനാട്യത്തില്‍ ആയിരങ്ങള്‍ കാണികളായി.
വിശ്വത്തിന്റെ കലാകാരനായ മുഴുവന്‍ കലകളുടെയും നാഥനായ നടരാജനായ ഭഗവാന്‍ ശിവനെ സ്തുതിച്ചുകൊണ്ടുളള നാഗസ്വരാവലി രാഗത്തില്‍ ആദിതാളത്തില്‍ ചിട്ടപ്പെടുത്തിയ പുഷ്പാഞ്ജലിയോടെയാണ് ഭരതനാട്യം ആരംഭിച്ചത്. തുടര്‍ന്ന് തമിഴില്‍ നാട്ടുകുറിഞ്ഞി രാഗത്തില്‍ പ്രൊഫ. സി.ഡി. ചന്ദ്രശേഖരന്‍ ചിട്ടപ്പെടുത്തിയ പാപനാശം ശിവന്‍ സംഗീതം പകര്‍ന്ന നടരാജനെ സ്തുതിച്ചു കൊണ്ടുളള വര്‍ണ്ണമാണ് അരങ്ങേറിയത്. ചിദംബരനാഥനായ ശിവനെ സ്തുതിച്ചുകൊണ്ടുള്ള രഞ്ജിത്തിന്റെയും വിജ്‌നയുടെയും അവതരണം സാക്ഷാല്‍ ശ്രീപരമേശ്വര ദര്‍ശനമാണ് പ്രദാനം ചെയ്തത്.
ഭഗവാന്‍ ശിവന്റെ നൃത്താനുഭൂതി നുകരാന്‍ ബ്രഹ്മാവും വിഷ്ണുവും സകലദേവന്മാരും പ്രത്യക്ഷരായിരിക്കുന്ന അപൂര്‍വ്വ പദമാണ് വിജ്‌ന അവതരിപ്പിച്ചത്. ഹിന്ദോളരാഗത്തില്‍ ആദി താളത്തില്‍ തമിഴില്‍ അവതരിപ്പിച്ച പദം നിറഞ്ഞ കൈയ്യടിയോടെയാണ് കാണികള്‍ ഏറ്റുവാങ്ങിയത്. ദുഷ്ട ശക്തികളെ നിഗ്രഹിക്കുന്ന രുദ്രനായ ശിവനെയാണ് തുടര്‍ന്ന് ഭജനയിലൂടെ രഞ്ജിത്ത് അവതരിപ്പിച്ചത്. ശങ്കരരാഗത്തില്‍ ആദിതാളത്തില്‍ ഹിന്ദിയില്‍ സംഗീതം പകര്‍ന്ന ശിവനടനം ഏറെ ഹൃദ്യമായിരുന്നു. ഭൂപാളരാഗത്തില്‍ ആദിതാളത്തില്‍ ചിട്ടപ്പെടുത്തിയ സ്വരാവലിയോടെയാണ് ഒന്നരമണിക്കൂര്‍ നീണ്ടുനിന്ന ഭരതനാട്യ വിസ്മയത്തിന് തിരശ്ശീല വീണത്.
നൃത്തോത്സവത്തിന്റെ മൂന്നാം ദിനമായ ഇന്ന് അദ്വൈതഭൂമിയില്‍ ഇദംപ്രഥമമായി ബാംഗ്ലൂര്‍ സരിതാ മിശ്രയുടെ ഒഡിസി അരങ്ങേറും. തനത്കലകളുടെ ഉത്സവത്തിലേക്ക് ആയിരങ്ങളാണ് ഓരോ ദിവസവും ഒഴുകിയെത്തുന്നത്. ശ്രീശങ്കരാ സ്‌ക്കൂള്‍ ഓഫ് ഡാന്‍സാണ് പരിപാടിയുടെ സംഘാടകര്‍.
