ന്യൂദല്ഹി: ജുവനൈല് നിയമ പ്രായപരിധി 16 ആക്കണമെന്ന ആവശ്യം അതിശക്തമായി ഉന്നയിച്ചതും ഇരുസഭകളിലും ബില് പാസാക്കിയതും കേന്ദ്രവനിതാ-ശിശുക്ഷേമ മന്ത്രി മേനകാ ഗാന്ധിയുടെ വിജയമായി. ബില്ലിനെ പിന്തുണയ്ക്കുമെന്ന് കരുതിയ ഇടത് വനിതാ നേതാക്കള് ഉള്പ്പെടെ ബില്ലിനെതിരെ രംഗത്തെത്തിയപ്പോള് കൃത്യമായ നിലപാടുകളുമായി മുന്നോട്ടുപോയതാണ് ബില് പാസാകാന് കാരണം. ഇന്നലെ രാജ്യസഭയില് നടന്ന ചര്ച്ചയിലും അവര് നിലപാടുകള് കൃത്യമായി അവതരിപ്പിച്ചു.
വികാരങ്ങള്ക്കടിമപ്പെട്ട് നിയമനിര്മ്മാണം നടത്തരുതെന്ന ആവശ്യമാണ് സിപിഎം ജനറല് സെക്രട്ടറി സീതാറാം യെച്ചൂരി അടക്കമുള്ള പ്രമുഖ പ്രതിപക്ഷ നേതാക്കള് സഭയില് പ്രകടിപ്പിച്ചത്. ദാരിദ്ര്യവും മോശം സാഹചര്യവുമാണ് കുട്ടികളെ കുറ്റവാളികളാക്കുന്നതെന്നും ഇവര് വാദിച്ചു. എന്നാല് ദാരിദ്ര്യം മാത്രമല്ല കുട്ടികള് കുറ്റവാളികളായി മാറാന് കാരണമെന്നും ലോകത്തിലേറ്റവും കൂടുതല് മാനഭംഗക്കേസുകള് റിപ്പോര്ട്ട് ചെയ്യുന്ന രാജ്യം സ്വീഡനാണെന്നും മേനക ചര്ച്ചയില് ചൂണ്ടിക്കാട്ടി. പുതിയ മാനഭംഗം തടയാനുള്ള നിയമം വന്നതുവഴി കൂടുതല് സ്ത്രീകള് കേസുകള് നല്കാന് തയ്യാറായി മുന്നോട്ടുവന്നിട്ടുണ്ടെന്നും അവര് പറഞ്ഞു.
ജുവനൈല് ബോര്ഡിലെ സൈക്കോളജിസ്റ്റുകള് ഉള്പ്പെട്ട വിദഗ്ധസംഘം കുട്ടിക്കുറ്റവാളിയുടെ കുറ്റകൃത്യം വിലയിരുത്തി കുട്ടിത്തമാണോ അതോ ഗൗരവമേറിയതാണോ പ്രവൃത്തിയെന്ന് പരിശോധിച്ച ശേഷമായിരിക്കും ശിക്ഷ വിധിക്കുകയെന്നും മേനകാ ഗാന്ധി വിശദീകരിച്ചു.
ദല്ഹി കൂട്ടമാനഭംഗക്കേസില് കൊല്ലപ്പെട്ട ജ്യോതിസിങിന്റെ മാതാവ് ആശാദേവിയും പിതാവ് ബദ്രിനാഥും ജുവനൈല് നിയമഭേദഗതി ചര്ച്ച വീക്ഷിക്കാന് രാജ്യസഭയിലെത്തിയിരുന്നു. ഉച്ചയ്ക്ക് രണ്ടരയോടെ ആരംഭിച്ച ചര്ച്ച നാലുമണിക്കൂറുകള് നീണ്ടുനിന്നു.
ജുവനൈല് നിയമത്തിന്റെ പ്രായപരിധി 16 വയസ്സാക്കി കുറയ്ക്കണമെന്ന് 2015 ഏപ്രില് 22ന് കേന്ദ്രമന്ത്രിസഭയാണ് തീരുമാനമെടുത്തത്. ജുവനൈല് പ്രായ പരിധി 18ല് നിന്നും 16 ആക്കി കുറയ്ക്കുന്നതു സംബന്ധിച്ച് ഏപ്രില് 6ന് സുപ്രീംകോടതി കേന്ദ്രസര്ക്കാരിന്റെ നിലപാട് ആരാഞ്ഞ പശ്ചാത്തലത്തിലായിരുന്നു തീരുമാനം. കൗമാരപ്രായക്കാര്ക്കിടയിലെ ക്രൂരമായ കുറ്റകൃത്യങ്ങളുടെ എണ്ണം ക്രമാതീതമായി വര്ദ്ധിക്കുന്നതും കേന്ദ്രസര്ക്കാര് കണക്കിലെടുത്തു. തുടര്ന്ന് മണ്സൂണ് സെഷനില് ബില് ലോക്സഭ പാസാക്കിയെങ്കിലും കോണ്ഗ്രസിന്റെയും ഇടതു പാര്ട്ടികളുടേയും എതിര്പ്പിനെ തുടര്ന്ന് രാജ്യസഭയില് പാസാകാതെ കിടക്കുകയായിരുന്നു.
ബാലനീതി നിയമത്തിന്റെ പരിധി 18ല് നിന്നും 16 ആയി കുറച്ചതോടെ കുട്ടികളെ കൂടുതല് ജാഗ്രതയോടെ വളര്ത്തേണ്ടതിന്റെ ആവശ്യകത പൊതുസമൂഹം തിരിച്ചറിയേണ്ടിവരും. ജുവനൈല് കുറ്റവാളികള്ക്ക് തെറ്റുകള് തിരിച്ചറിയുന്നതിനാവശ്യമായ ബോധവല്ക്കരണ ക്ലാസുകള് കൊടുക്കണമെന്നും ഇവരെ സാധാരണ കുറ്റവാളികള്ക്കൊപ്പം പാര്പ്പിക്കരുതെന്നും രാജ്യസഭയില് അംഗങ്ങള് ആവശ്യപ്പെട്ടു. ഇതെല്ലാം കണക്കിലെടുത്തുള്ള നടപടികള് സ്വീകരിക്കുമെന്ന് കേന്ദ്രസര്ക്കാരും അറിയിച്ചു.
