പാലാ: ജനറല് ആശുപത്രി പരിസരത്തും ളാലം സമൂഹമഠം റോഡിലും മദ്യപാന ശല്യം രൂക്ഷമാകുന്നു. രാപകല് വിത്യാസമില്ലാതെ ആശുപത്രിയുടെ മുന്വശത്തുള്ള പെട്ടികടകള് കേന്ദ്രീകരിച്ചാണ് മദ്യപന്മാര് വിലസുന്നത്. ഈ ഭാഗത്തെ മാടക്കടകളിലാണ് ആശുപത്രിയിലെ രോഗികള്ക്കായി വെള്ളം തിളപ്പിച്ച് നല്കുന്നതും പാലു കാച്ചി നല്കുന്നതും. എന്നാല് ചില കടക്കാരുടെ സഹകരണത്തോടെ കയറ്റിറക്ക് ജോലിക്കാരെന്ന വ്യാജേന എത്തുന്ന മദ്യപന്മാര് സംഘം ചേര്ന്ന് മദ്യപിക്കുകയാണ്. ഇതോടെ ആശുപത്രിയിലെത്തുന്നവര്ക്കോ, വഴി നടക്കുന്നവര്ക്കോ ഈ ഭാഗത്തേക്ക് വരാന് കഴിയാത്ത അവസ്ഥയാണ്. സമീപത്തെ ഓട്ടോറിക്ഷ തൊഴിലാളികള് എതിര്പ്പുമായി എത്തിയെങ്കിലും ഭീഷണിപ്പെടുത്തി തിരിച്ചയച്ച ശേഷം മദ്യപാനം തുടരുകയായിരുന്നു. പോലീസിനോട് പരാതിപ്പെട്ടിട്ടും നടപടിയെടുക്കുന്നില്ലെന്ന് ആക്ഷേപമുണ്ട്. ശല്യം രൂക്ഷമാകുമ്പോള് പോലീസിനെ അറിയിച്ചാല് ഇവിടെയെത്തി പുകവലിക്കുന്നവരെ പെറ്റിയടിച്ച ശേഷം വേഗത്തില് മടങ്ങുകയാണ് പതിവ്.
ളാലം ക്ഷേത്രത്തിന് സമീപം സമൂഹം റോഡിലും മദ്യപാനികളുടെ ശല്യം രൂക്ഷമാണ്. സംഘം ചേര്ന്നും ഒറ്റക്കും എത്തുന്ന മദ്യപാനികള് റോഡില് തടസ്സം സൃഷ്ടിക്കുന്നതും വഴി യാത്രക്കാര്ക്ക് ഭീഷണിയാകുന്നതും പതിവാണ്. സ്ത്രീകളും കുട്ടികളും ഉള്പ്പെടെ നിരവധി ആളുകളും ക്ഷേത്രത്തിലേക്ക് എത്തുന്നവരും ഉപയോഗിക്കുന്ന വഴിയാണിത്. പോലീസിലറിയിച്ചിട്ടും നടപടിയോ, പട്രോളിങ്ങോ നടത്തുന്നില്ലെന്ന് പരാതിയുണ്ട്.
