വിനോജി കെ.വി
വാഗമണ്: വാഗമണ്ണിലെത്തുന്ന വിനോദ സഞ്ചാരികള്ക്ക് ചുരുങ്ങിയ ചെലവില് താമസ സൗകര്യമൊരുക്കുന്നതിനായി ടൂറിസം വകുപ്പ് നിര്മ്മിച്ച മന്ദിരത്തിന് ഇതുവരെ ലൈസന്സ് കിട്ടിയിട്ടില്ല. മൂന്ന് വര്ഷം മുന്പ് മന്ദിരത്തിന്റെ ഉദ്ഘാടനം നടത്തിയിരുന്നു. ടൂറിസം വകുപ്പിന്റെ ചുമതലയുള്ള മന്ത്രി എ.പി അനില്കുമാറായിരുന്നു ഉദ്ഘാടനം നിര്വ്വഹിച്ചത്. കെട്ടിടത്തിന് പഞ്ചായത്തില് നിന്നും ലഭിക്കേണ്ട ലൈസന്സില്ലാതെയാണ് ഉദ്ഘാടന ചടങ്ങ് സംഘടിപ്പിച്ചത്. രണ്ട് കോടി രൂപമുടക്കിയാണ് ടൂറിസം വിഭാഗം കെട്ടിടം നിര്മ്മിച്ചത്. നൂറോളം പേര്ക്ക് ചുരുങ്ങിയ ചെലവില് താമസ സൗകര്യമൊരുക്കുന്നതിനാണ് മന്ദിരം നിര്മ്മിച്ചത്. എന്നാല് ഏലപ്പാറ പഞ്ചായത്ത് അധികാരികളും ടൂറിസം ഡിപ്പാര്ട്ട്മെന്റും തമ്മിലുള്ള ശീത സമരത്തെത്തുടര്ന്ന് കെട്ടിടത്തിന് ലൈസന്സ് ലഭിച്ചിട്ടില്ല. മന്ദിരത്തിനുള്ളില് മഴവെള്ള സംഭരണിയില്ലെന്നാണ് ലൈസന്സ് നല്കാനുള്ള പ്രധാന തടസമായി പഞ്ചായത്ത് പറയുന്നത്. നിയമം ലംഘിച്ച് വാഗമണ്ണില് നിരവധി കെട്ടിടങ്ങള് പ്രവര്ത്തിക്കുമ്പോഴാണ് സര്ക്കാര് നിര്മ്മിച്ച മന്ദിരത്തിന് ലൈസന്സ് ലഭിക്കാന് താമസം നേരിടുന്നത്. ലൈസന്സ് ലഭിക്കുന്നതിനായി ടൂറിസം വിഭാഗം പഞ്ചായത്തില് നല്കിയ അപേക്ഷ കാണാതായ സംഭവവും നടന്നിരുന്നു. വീണ്ടും അപേക്ഷ നല്കിയിട്ടുണ്ടെന്ന് ടൂറിസം വകുപ്പ് ഡെപ്യൂട്ടി ഡയറക്ടര് തോമസ് കോര ജന്മഭൂമിയോട് പറഞ്ഞു. കെട്ടിടലൈസന്സ് ലഭിക്കാത്തതിനാല് വൈദ്യുതി കണക്ഷനും ലഭിച്ചിട്ടില്ല. എത്രയും വേഗം മന്ദിരത്തിന് ലൈസന്സ് ലഭിക്കാന് മന്ത്രിതലത്തില് നീക്കമുണ്ടാകണമെന്നാണ് വിനോദ സഞ്ചാരികളുടെ ആവശ്യം
