പത്തനംതിട്ട: പൊലിസുകാരനെ മര്‍ദിക്കാന്‍ ശ്രമിച്ച ് ഓട്ടോ ഡ്രൈവര്‍മാരെ അറസ്റ്റ് ചെയ്തു. മേലേവെട്ടിപ്പുറം ലക്ഷംവീടു കോളനിയില്‍ ഫൈസല്‍(25), ആനപ്പാറ ചുട്ടിപ്പാറ വടക്കേച്ചരുവില്‍ സഞ്ജു സുരേന്ദ്രന്‍(26), തൈക്കാവ് അനീഷാ മന്‍സിലില്‍ എസ്. അജീഷ്(30), മയിലാടുംപാറ വെള്ളപ്ലാക്കല്‍ ലാലു ഏലിയാസ് റോയ്(32) എന്നിവരെയാണ് പത്തനംതിട്ട പൊലിസ് അറസ്റ്റ് ചെയ്തത്. സ്വകാര്യ ബസ്റ്റാന്റു പടിക്കല്‍ ഇന്നലെ വൈകിട്ട് അഞ്ചരയോടെ ആയിരുന്നു സംഭവം.
സ്റ്റാന്റിലെ വ്യാപാരികള്‍ക്ക് ബുദ്ധിമുട്ടുണ്ടാക്കുന്ന തരത്തില്‍ ഓട്ടോറിക്ഷാ പാര്‍ക്ക് ചെയ്യുന്നതു സംബന്ധിച്ച പരാതിയെപറ്റി അന്വേഷിക്കാനെത്തിയ സീനിയര്‍ സിവില്‍ പൊലിസ് ഓഫീസര്‍ അയ്യപ്പദാസിനെയാണ് നാല്‍വര്‍ സംഘം മര്‍ദിക്കാന്‍ ശ്രമിച്ചത് എന്ന് പൊലിസ് പറഞ്ഞു. എസ്പി ടി. നാരായണന് വ്യാപാരികള്‍ സമര്‍പ്പിച്ച പരാതിയെപറ്റി അന്വേഷിക്കാന്‍ എത്തിയതായിരുന്നു അയ്യപ്പദാസ്. ഇദ്ദേഹത്തെ ഡ്രൈവര്‍ സംഘം തടയുന്നതു കണ്ട് ഇടപെട്ട സ്‌പെഷല്‍ പൊലിസ് ഓഫീസര്‍ മുഹമ്മദ് ഷൈനുവിനെയും ഇവര്‍ ഉപദ്രവിക്കാന്‍ ശ്രമിച്ചു. ഇതേതുടര്‍ന്ന് കൂടുതല്‍ പൊലിസ് സ്ഥലത്തെത്തി നാല് ഓട്ടോറിക്ഷാ ഡ്രൈവര്‍മാരെയും കസ്റ്റഡിയില്‍ എടുക്കുകയായിരുന്നു. ഔദ്യോഗിക കൃത്യനിര്‍വഹണം തടസപ്പെടുത്തിയ വകുപ്പില്‍ ഇവര്‍ക്കെതിരെ കേസെടുക്കുമെന്ന് പൊലിസ് പറഞ്ഞു.
പ്രതികരിക്കാൻ ഇവിടെ എഴുതുക: