നിങ്ങളുടെ ആത്മാവിനെ സംബന്ധിച്ച മൗലീകതത്വം നിങ്ങള് അറിയുന്നില്ലെങ്കില് പരമാത്മാവിനോടും, സഹജീവികളോടും ആത്മഭാവേന നിങ്ങള്ക്കുള്ള ബന്ധവും ബന്ധുത്വവും അറിയുവാന് സാദ്ധ്യമല്ല. ആത്മജ്ഞാനമാണ് സദാചാരപരമായ പെരുമാറ്റത്തിന്റേയും ധര്മ്മ നിഷ്ഠയുടേയും ഈശ്വരഭക്തിയുടേയും നിസ്വാര്ത്ഥ സേവനത്തിന്റേയും ഗൃഹത്തിലും സമൂഹത്തിലും ഐക്യം പുലര്ത്തിക്കൊണ്ടുള്ള പ്രശാന്ത ജീവിതത്തിന്റേയും അടിസ്ഥാനം.
ആത്മസത്യം നിങ്ങളുടെ പ്രജ്ഞയില് പ്രകാശിയ്ക്കണം. ആത്മസ്മൃതി പ്രകാശം ചെയ്യുമ്പോള് മാത്രമേനിങ്ങള്ക്ക് കര്ത്തവ്യ നിരതവും നിസ്സംഗരുമായ് ജീവിയ്ക്കുവാന് സാധിയ്ക്കുകയുള്ളൂ. കര്ത്തവ്യ ബോധംഒരുമഹത്തായ മാനുഷിക ഗുണമാണ്. തന്നോടും ഈശ്വരനോടും സഹജീവികളോടും തനിയ്ക്കുള്ള കടമകള് നിര്വ്വഹിയ്ക്കുവാനുള്ള സൗകര്യം മനുഷ്യനുമാത്രം ലഭിച്ചിട്ടുള്ള ഒരനുഗ്രഹമാണ്.
ഈശ്വരനുമായി ഐക്യം പ്രാപിയ്ക്കുകയാണ് പരമമായ മനുഷ്യധര്മ്മം. ജീവിതത്തിലെ വിവിധ വസ്തുക്കളിലുള്ള മറ്റ് ധര്മ്മങ്ങളെല്ലാം ഈശ്വരസാക്ഷാത്കാരം സാധിയ്ക്കുക എന്ന പരമമായ ധര്മ്മത്തിന്റെ നിര്വ്വഹണത്തിന് നിങ്ങളെ പ്രാപ്തരാക്കാന് ഉദ്ദേശിച്ചുകൊണ്ടുള്ളവയാണ്. സ്വന്തം കര്ത്തവ്യങ്ങളോട് നീതിയും നിഷ്ഠയും പുലര്ത്തുന്നവര് ധാരാളം ഉണ്ടായിരിക്കാം. പക്ഷേ അവര്ക്ക് ആദ്ധ്യാത്മികമായ പ്രചോദനമില്ലങ്കില് അവരുടെ ലക്ഷ്യം
ഈശ്വരസാക്ഷാത്ക്കാരമല്ലെങ്കില് അത്തരം കര്ത്തവ്യ പാരായണതയെ ആദ്ധ്യാത്മിക സാധനയായി പരിഗണിക്കുവാന് പാടില്ല. ജീവിത ലക്ഷ്യത്തെ ഈശ്വരനില് സുപ്രതിഷ്ഠിതമാക്കിക്കൊണ്ട് ഈശ്വരോന്മുഖമായി ചരിച്ച് തുടങ്ങുമ്പോള് മാത്രമാണ് സാധന സമാരംഭിയ്ക്കുന്നത്.
ഓരോരുത്തരും ജന്മമെടുക്കുന്നത് സ്വധര്മ്മം, ധാര്മ്മികമായ കര്ത്തവ്യം സാമൂഹിക കടപ്പാട് ഇവയോടു കൂടിയാണ്. ഈശ്വരാവതാരങ്ങളും മുക്തപുരുഷന്മാരും കര്മ്മത്തിനതീതരാണ്. എങ്കില് അവര് ഭൂമിയിലേയ്ക്ക് അവതരണം ചെയ്യുമ്പോള് അവര് സ്വയം കര്ത്തവ്യമേറ്റെടുക്കുകയും മനുഷ്യരാശിയുടെ നന്മയ്ക്കുവേണ്ടി കര്മ്മനിരതരാവുകയും ചെയ്യും. സംസാരികളായ ജീവന്മാര് കര്ത്തവ്യാനുഷ്ഠാനത്തിലും ധര്മ്മ നിഷ്ഠയിലും ആദ്ധ്യാത്മിക സാധനയിലും പരിശുദ്ധിനേടണം.
