ചേര്ത്തല: പുറമ്പോക്ക് ഭൂമി സ്വകാര്യ വ്യക്തിയുടെ പേരിലേക്ക് മാറ്റിയതുമായി ബന്ധപ്പെട്ട അന്വേഷണം വിജിലന്സിനെ ഏല്പ്പിച്ചേക്കും. ചേര്ത്തല തെക്ക് വില്ലേജ് ഓഫീസിന്റെ പരിധിയിലുള്ള 42.5 സെന്റ് വസ്തുവാണ് കഴിഞ്ഞ സപ്തംബര് 22ന് പുറമ്പോക്കില് നിന്നു വരവ് എന്ന് രേഖപ്പെടുത്തി സ്വകാര്യ വ്യക്തിയുടെ പേരിലേക്ക് മാറ്റി കരം അടച്ചത്.
ഏറെ നാളായി സ്വകാര്യ വ്യക്തിയുടെ കൈവശത്തിലുള്ള ഭൂമി പോക്കുവരവ് ചെയ്തു കിട്ടുന്നതിന് 2011ല് റീസര്വേ അദാലത്തില് അപേക്ഷ നല്കിയിരുന്നു. തുടര്ന്ന് സര്വേയര് സ്ഥലം പരിശോധിച്ചതില് വില്ലേജ് രേഖകള് പ്രകാരം പഞ്ചായത്ത് പുറമ്പോക്ക് എന്നായതിനാല് അപേക്ഷ അംഗീകരിച്ചില്ല. എന്നാല് ഇതിനിടെയാണ് കഴിഞ്ഞ സെപ്തംബറില് വില്ലേജ് ഓഫീസിലെ തണ്ടപ്പേര് റജിസ്റ്ററില് തിരുത്തലുകള് വരുത്തി പോക്കുവരവ് ചെയ്തത്.
തുടര്ന്നാണ് അഡീഷണല് തഹസില്ദാര് കെ.ശ്രീലത തണ്ടപ്പേരില് വ്യാജ രേഖപ്പെടുത്തല് നടത്തിയെന്ന് കണ്ട് കഴിഞ്ഞ 20ന് ഇതിലെ രേഖപ്പെടുത്തലുകള് റദ്ദാക്കി ഉത്തരവായത്. മാത്രമല്ല ഇതുസംബന്ധിച്ച ക്രമക്കേടുകളില് വിശദമായ അന്വേഷണം ആവശ്യപ്പെട്ട് കലക്ടര്ക്ക് റിപ്പോര്ട്ട് നല്കുകയും ചെയ്തിട്ടുണ്ട്. ഇതേ വ്യക്തിക്ക് ചേര്ത്തല താലൂക്കിലുള്ള മുഴുവന് സ്ഥലങ്ങളുടെയും സര്വേ നടത്തുവാനും തീരുമാനിച്ചു.
എന്നാല് 1986ല് വാങ്ങിയ വസ്തുവാണിതെന്നും റീസര്വേയിലെ പിഴവാണ് പുറമ്പോക്കായി മാറുവാന് കാരണമായതെന്നുമാണ് ആരോപണവിധേയനായ വ്യക്തി പറയുന്നത്.
