വത്തിക്കാന്‍ സിറ്റി: വത്തിക്കാനില്‍ നിന്നും രേഖകള്‍ ചോര്‍ത്തിയതുമായി ബന്ധപ്പെട്ട് അഞ്ച് പേര്‍ക്കെതിരെ വത്തിക്കാന്‍ ജഡ്ജി കുറ്റം ചുമത്തി. രണ്ടു പത്രപ്രവര്‍ത്തകരും ഒരു ഉന്നത പുരോഹിതനുമുള്‍പ്പടെ അഞ്ചുപേര്‍ക്കതിരെയാണ് രേഖകള്‍ ചോര്‍ത്തി സഭയെ അവഹേളിച്ചെന്നാരോപിച്ച് കുറ്റം ചുമത്തിയിരിക്കുന്നത്.
പോപ്പിന്റെ പരിഷ്‌ക്കരണകമ്മീഷനിലെ രണ്ടംഗങ്ങളും ഒരു അസിസ്റ്റന്റും രണ്ട് പത്രപ്രവര്‍ത്തകരും ചേര്‍ന്നാണ് അതീവ രഹസ്യരേഖകള്‍ ചോര്‍ത്തിയതെന്നാണ് കുറ്റപ്പത്രം. ഉന്നത പുരോഹിതന്മാരായ ലൂസിയോ ഏയ്ഞ്ചല്‍ ബാല്‍ഡോ, ഫ്രാന്‍സിക്കോ ചൗക്യന്‍ എന്നിവരെ ഈ മാസമാദ്യം അറസ്റ്റ് ചെയ്തിരുന്നു. അന്വേഷണവുമായി സഹകരിക്കുമെന്ന് ഉറപ്പ് നല്‍കിയതിനെത്തുടര്‍ന്ന് ഇവരെ പിന്നീട് മോചിപ്പിച്ചിരുന്നു.
2012ല്‍ പോപ്പ് ബെനഡിക്ട് പതിനാറാമന്‍ സഭയുടെ തലവനായിരുന്നപ്പോഴുള്ള അതീവ രഹസ്യമായ രേഖകള്‍ ചോര്‍ന്നിരുന്നു. ഈയിടെ ഇറങ്ങിയ രണ്ടു പുസ്‌കങ്ങളില്‍ ഇക്കാര്യങ്ങള്‍ പുറംലോകത്തെത്തിയതോടെയാണ് വത്തിക്കാന്‍ പോലീസ് അന്വേഷണം ആരംഭിച്ചത്. പിടിയിലായ സഭക്കുള്ളിലെ മൂന്നേ പേര്‍ കൂടുതല്‍ കുറ്റാരോപണങ്ങള്‍ നേരിടേണ്ടി വരും.
