തൊടുപുഴ കൃഷ്ണന് ഒരുപിടി മണ്ണ് സമര്‍പ്പിച്ചു

തൊടുപുഴ: കൃഷ്ണതീര്‍ത്ഥം ഓഡിറ്റോറിയത്തില്‍ നടന്ന ചടങ്ങില്‍ സിനിമാതാരം ഭരത് സുരേഷ് ഗോപി കൃഷ്ണ ഭഗവാന് ഒരുപിടി മണ്ണ് സമര്‍പ്പിച്ചു. പ്രൗഡ ഗംഭീരമായ ചടങ്ങില്‍ ആയിരങ്ങളെ സാക്ഷി നിര്‍ത്തിയാണ് ഭൂമി സമര്‍ണം നടന്നത്. കഴിഞ്ഞ ഒരു വര്‍ഷമായി നടന്നു വന്ന ‘തൊടുപുഴ കൃഷ്ണന് ഒരുപിടി മണ്ണ്’ എന്ന പദ്ധതി കൃഷ്ണകൃപ സത്സംഗ സമിതിയാണ് പ്രാവര്‍ത്തികമാക്കിയത്. 2014 ല്‍ ക്ഷേത്രത്തില്‍ നടന്ന സപ്താഹത്തോടനുബന്ധിച്ചാണ് തൊടുപുഴ കൃഷ്ണന് ഒരുപിടി മണ്ണ് എന്ന പദ്ധതി ആരംഭിച്ചത്. ഒരു വര്‍ഷം കൊണ്ട് 2000 ലേറേ കുടുംബങ്ങളുടെ സഹായത്തോടെയാണ് 10 സെന്റ് ഭൂമി വാങ്ങി സമര്‍പ്പിച്ച് പദ്ധതി വിജയപഥത്തിലെത്തിച്ചത്. ഇടുക്കി ജില്ല കളക്ടര്‍ വി. രതീശന്‍ ചടങ്ങ് ഉദ്ഘാടനം ചെയ്തു. തനിക്ക് ലഭിച്ച അസുലഭ നിമിഷമായി ഇതിനെ കാണുന്നുവെന്നും നാടിന്റെ ഉന്നമനത്തിനായി ഒത്തോരുമയോടെ പ്രവര്‍ത്തിക്കാമെന്നും കളക്ടര്‍ ഭക്തജനങ്ങളോട് പറഞ്ഞു. ഗുരുവായൂര്‍ ഏകാദശിയോടനുബന്ധിച്ച് ക്ഷേത്രത്തില്‍ ഇന്നലെ ലക്ഷാര്‍ച്ചനയും നടന്നു. ധനസമാഹരണ വേളയില്‍ 20 രൂപയും 5 രൂപയും നല്‍കി തങ്ങളാലാവുന്ന വിധം സഹകരിച്ച  നിര്‍ദ്ധനരായ കുടുംബങ്ങള്‍ക്ക് 20000 രൂപയും 5000 രൂപയും വീതം സുരേഷ് ഗോപി ധനസഹായം നല്‍കി. ഈ തുക സത്സംഗ സമിതിക്ക് സുരേഷ് ഗോപി ചടങ്ങിന് ശേഷം കൈമാറി. ഭാഗവതാചാര്യന്‍ നീലംപേരൂര്‍ പുരുഷോത്തമദാസ്, കെ വിജയന്‍, ഇ.എ.പി മുകുന്ദന്‍, പി.ജി വിജയകുമാര്‍, പി.കെ രാമചന്ദ്രന്‍,എസ്. പത്മഭൂഷണ്‍, രമേശ് ജ്യോതി തുടങ്ങിയവര്‍ സംസാരിച്ചു.