തിരുവനന്തപുരം: ഏജീസ് ഓഫീസിനുസമീപമുള്ള സ്ഥലം ഏറ്റെടുത്തു നല്കുന്നതിനെച്ചൊല്ലിയുണ്ടായ തര്ക്കം സംഘര്ഷത്തില് കലാശിച്ചു. ഒടുവില് ലത്തീന് സഭയുടെ ഇടപെടലിനു വഴങ്ങി സ്ഥലമെടുപ്പ് നിര്ത്തിവയ്ക്കാന് മുഖ്യമന്ത്രി നിര്ദേശിക്കുകയായിരുന്നു.
ഏജീസ് ഓഫീസിനായി സര്ക്കാര് അനുവദിച്ച പുറമ്പോക്ക് ഭൂമി ഏറ്റെടുക്കാന് സര്ക്കാര് ഉത്തരവായിരുന്നു. ഈ ഉത്തരവ് നടപ്പാക്കാനെത്തിയ റവന്യൂ ഉദ്യോഗസ്ഥരെ ലത്തീന് അതിരൂപതയുടെ നേതൃത്വത്തില് വൈദികരടങ്ങുന്ന ഒരു സംഘം തടഞ്ഞു. ലത്തീന് അതിരൂപതയുടെ കീഴിലുള്ള സോഷ്യല് ഫോറത്തിന്റെ കെട്ടിടത്തോടുചേര്ന്ന സ്ഥലമാണ് റവന്യൂ വകുപ്പ് ഏറ്റെടുക്കാന് എത്തിയത്. ഇതിനുള്ള നടപടിക്രമങ്ങള് തുടങ്ങിയപ്പോഴാണ് തടസവാദവുമായി വൈദികരടങ്ങുന്ന സംഘം രംഗത്തെത്തിയത്.
എംജിറോഡ് വീതികൂട്ടുന്നതിന്റെ ഭാഗമായി ഏജീസ് ഓഫീസില് നിന്ന് 45 സെന്റ് സ്ഥലം സര്ക്കാര് ഏറ്റെടുത്തിരുന്നു. ഇതിനു പകരമായി നല്കാമെന്ന് സര്ക്കാര് സമ്മതിച്ചിരുന്ന പുറമ്പോക്കില് മുത്തൂറ്റ് ഫൈനാന്സ് കെട്ടിടം പണിതു. തുടര്ന്ന് ഏജീസിനും കാനറാ ബാങ്കിനുമിടയിലുള്ള രണ്ടരസെന്റ്് സഥലം സര്ക്കാര് അനുവദിച്ചു. ഇത് റവന്യൂവകുപ്പ് ഏറ്റെടുക്കനെത്തിയപ്പോഴാണ് എതിര്പ്പുമായി ഫിഷര്മെന് സോഷ്യല് സര്വീസ് സൊസൈറ്റിയുടെ ഭാരവാഹികളും ലത്തീന് അതിരൂപതയും രംഗത്തെത്തിയത്.
ഈ രണ്ടരസെന്റ് സ്ഥലം ഏജീസ് ഓഫീസിനു നല്കുമ്പോള് മുത്തൂറ്റിനു പുറകുവശത്തുകൂടിയുള്ള വഴി നഷ്ടമാകും. അതിനാലാണ് ലത്തീന് അതിരൂപതയുടെയുടെ ഇടപെടല് ഉണ്ടായത്. ഇന്നലെ ലത്തീന് സഭ മുന്മന്ത്രി സി. ദിവാകരന്റെ നേതൃത്വത്തില് മാര്ച്ച നടത്തിയിരുന്നു. ഒടുവില് ലത്തീന് സഭയുടെ ഇടപെടലിനു വഴങ്ങി സ്ഥലമെടുപ്പ് നിര്ത്തിവയ്ക്കാന് മുഖ്യമന്ത്രി നിര്ദേശിച്ചു.
