ചങ്ങനാശ്ശേരി: വിദ്യാര്ത്ഥി ഇറക്കമുള്ള പാന്റു ധരിച്ചതിന് അദ്ധ്യാപകന് ക്രൂരമായി മര്ദ്ദിച്ചതായി പരാതി. നെടുങ്ങാടപ്പള്ളി സിഎംഎസ് ഹൈസ്കൂളിലെ എട്ടാംക്ലാസ് വിദ്യാര്ത്ഥി ചങ്ങനാശ്ശേരി ശാന്തിപുരം ഗലേത് തടത്തില് ജോയല്(13)നെയാണ് മര്ദ്ദിച്ചതായി പരാതി ഉയര്ന്നിരിക്കുന്നത്. കാലിലും വയറിലും മര്ദ്ദനമേറ്റ വിദ്യാര്ത്ഥിയെ ചങ്ങനാശ്ശേരി ജനറല് ആശുപത്രിയില് പ്രവേശിപ്പിച്ചു.
തിങ്കളാഴ്ച ഉച്ചക്ക് രണ്ടരയോടെയാണ് സംഭവം. ഉച്ചകഴിഞ്ഞ് ക്ലാസില് ഇരിക്കുകയായിരുന്ന ജോയലിനെ സ്കൂളിലെ ഒരു അധ്യാപകന് മറ്റൊരു കുട്ടിയെവിട്ട് സ്റ്റാഫ് റൂമിലേക്ക് വിളിപ്പിക്കുകയും ഇറക്കമുള്ള ഷര്ട്ടും അരയില് നില്ക്കുന്ന പാന്റും ധരിച്ചതിനെ ചോദ്യം ചെയ്യുകയും വടികൊണ്ട് മര്ദ്ദിക്കുകയുമായിരുന്നുവെന്ന് വിദ്യാര്ത്ഥിയും പറയുന്നു. കൂടാതെ ഭിത്തിയിലേക്കു പിടിച്ചു തള്ളിയതിനാല് തലയിടിക്കുകയും തൊട്ടടുത്തു കിടന്ന മേശയില് വയര്ഭാഗം ഇടിക്കുകയും ചെയ്തു. ഈ സംഭവം കണ്ടുകൊണ്ടു പ്രധാന അധ്യാപകന് തൊട്ടടുത്ത് നിന്നിരുന്നതായും അധ്യാപകനെ ആക്ഷേപിച്ചുവെന്നുപറഞ്ഞ് തനിക്കെതിരെ പോലീസില് പരാതി നല്കുമെന്ന് അധ്യാപകന് ഭീഷണിപ്പെടുത്തിയതായും വിദ്യാര്ത്ഥി പറഞ്ഞു. തുടര്ന്ന് സ്കൂള് വിട്ടതിനുശേഷം അരമണിക്കൂറോളം വൈകിയാണ് തന്നെ വീട്ടില് പോകാന് അനുവദിച്ചതെന്നും ജോയല് പറയുന്നു. വീട്ടിലെത്തിയ കുട്ടിക്ക് അസ്വസ്ഥത അനുഭവപ്പെട്ടതിനെത്തുടര്ന്ന്് ആശുപത്രിയില് എത്തിക്കുകയായിരുന്നുവെന്ന് മാതാവ് ഡലീന പറഞ്ഞു.
സംഭവവുമായി ബന്ധപ്പെട്ട് കറുകച്ചാല് പോലീസില് പരാതിനല്കി. വൈകിട്ട് ആറുമണിയോടെ ചൈല്ഡ് വെല്ഫെയര് വിഭാഗം ഉദ്യോഗസ്ഥര് ആശുപത്രിയില് എത്തി കുട്ടിയില് നിന്നും വിവരങ്ങള് ശേഖരിച്ചു. വിദ്യാഭ്യാസ വകുപ്പിലെ ഉന്നത ഉദ്യോഗസ്ഥര്ക്കും പരാതി നല്കുവാന് ഒരുങ്ങുകയാണ് മാതാവ് ഡലീന. കഴിഞ്ഞദിവസം ചങ്ങനാശേരിയിലെ ഒരു സ്കൂളിലും അധ്യാപകന് വിദ്യാര്ത്ഥിയെ മര്ദ്ദിച്ച സംഭവം ഉണ്ടായി. ഒടുവില് കേസില്ലാതെ ഒത്തുതീര്പ്പാക്കുകയായിരുന്നു.
