കണ്ണൂര്: നൂതന വിദ്യാഭ്യാസ പ്രവര്ത്തനങ്ങള്ക്ക് നാഷണല് യൂണിവേഴ്സിറ്റി ഓഫ് എഡ്യുക്കേഷണല് പ്ലാനിംഗ് ആന്റ് അഡ്മിനിസ്ട്രേഷന് (ചഋഡജഅ) ദേശീയ തലത്തില് നല്കുന്ന പുരസ്കാരത്തിന് കേരളത്തില് നിന്നും കെ.പി.ഗോപിനാഥന് അര്ഹനായി. സര്വ്വ ശിക്ഷാ അഭിയാന് കണ്ണൂര് ജില്ലാ പ്രോജക്ട് ഓഫീസറാണ്. വിദ്യാഭ്യാസ രംഗത്ത് വിവിധ സംസ്ഥാനങ്ങളില് നടപ്പിലാക്കിയ മികച്ച നൂതന പ്രവര്ത്തനങ്ങള് വിലയിരുത്തിയാണ് അവാര്ഡ് നല്കുന്നത്. ഡിസംബര് 10 ന് ന്യൂഡല്ഹിയില് നടക്കുന്ന ചടങ്ങില് കേന്ദ്ര മാനവ വിഭവ ശേഷി വകുപ്പ് മന്ത്രി സ്മൃതി ഇറാനി അവാര്ഡ് സമ്മാനിക്കും.
പ്രൈമറി തലത്തിലെ കുട്ടികളുടെ വായന, എഴുത്ത് എന്നിവ മെച്ചപ്പെടുത്തുന്നതിന് ജില്ലയില് സര്വ്വശിക്ഷാ അഭിയാന് നടപ്പിലാക്കിയ അക്ഷരത്തെളിച്ചം, മഴവില്ല് പദ്ധതികളിലെ നുതന പ്രവര്ത്തനങ്ങളാണ് അവാര്ഡ് നേടിക്കൊടുത്തത്. കുട്ടികളുടെ ഭാഷാശേഷി മെച്ചപ്പെടുത്തുന്നതിനും വായന, എഴുത്ത് എന്നിവയിലുണ്ടാകുന്ന തെറ്റുകള് ഇല്ലാതാക്കുന്നതിനും 2013 ല് മൂന്നാം ക്ലാസ്സില് നടപ്പിലാക്കിയ പ്രത്യേക പ്രവര്ത്തന പദ്ധതിയാണ് അക്ഷരത്തെളിച്ചം. കുട്ടികളുടെ ഭാഷാശേഷി വര്ധിപ്പിക്കുന്നതില് വലിയ പുരോഗതിയാണ് അക്ഷരത്തെളിച്ചം കൊണ്ടുണ്ടായത്. നൂതന രീതിയില് തയ്യാറാക്കിയ തൊണ്ണൂറ് പ്രവര്ത്തനങ്ങളാണ് അക്ഷരത്തെളിച്ചത്തിലുള്ളത്. അക്ഷരത്തെളിച്ചത്തിന്റെ വിജയത്തെത്തുടര്ന്ന് 2014 ല് രണ്ടാം ക്ലാസ്സില് മഴവില്ല് എന്ന പ്രവര്ത്തന പദ്ധതി ആവിഷ്കരിക്കുകയുണ്ടായി. കണ്ണൂര് സര്വ്വ ശിക്ഷാ അഭിയാന് രൂപകല്പന ചെയ്ത മഴവില്ല് പ്രവര്ത്തന പുസ്തകം സംസ്ഥാനതലത്തില് ഉപയോഗിക്കപ്പെട്ടു. കുട്ടികളുടെ പഠന താല്പര്യം വര്ധിപ്പിച്ചുകൊണ്ട് അവരെ നിശ്ചിത ലക്ഷ്യത്തിലെത്തിക്കാന് സാധിച്ചു എന്നുള്ളതാണ് ശ്രദ്ധേയമായ കാര്യം. കണ്ണൂര് സര്വ്വശിക്ഷാ അഭിയാന് നടത്തിയിട്ടുള്ള മികവുറ്റ പ്രവര്ത്തനങ്ങള്ക്കുള്ള അംഗീകാരം കൂടിയാണിത്.
