കൊച്ചി: രാജ്യത്ത് ജൈവകൃഷി പ്രോത്സാഹിപ്പിക്കുന്നതിനായി കേന്ദ്ര സര്ക്കാര് സമഗ്ര പദ്ധതി തയാറാക്കിയിട്ടുണ്ടെന്ന് കേന്ദ്ര കൃഷി വകുപ്പ് ഡെപ്യൂട്ടി കമ്മീഷണര് ഡോ. അജയ് രാജ്പുത്. പതിനൊന്ന് പദ്ധതികളാണ് ജൈവകൃഷി പ്രോത്സാഹിപ്പിക്കുന്നതിനായി നടപ്പ് സാമ്പത്തികവര്ഷം കേന്ദ്രസര്ക്കാര് രൂപം നല്കിയിട്ടുള്ളതെന്ന് അദ്ദേഹം പറഞ്ഞു.
അങ്കമാലിയില് നടന്ന ബയോഫാക് ഇന്ത്യ ഇന്ത്യ ഓര്ഗാനിക് രാജ്യാന്തര സമ്മേളനത്തില് പങ്കെടുത്ത് സംസാരിക്കുകയായിരുന്നു അദ്ദേഹം. നാഷണല് പ്രൊജക്റ്റ് ഓണ് ഓര്ഗാനിക് ഫാമിംഗ്, എന്എഡിപി, രാഷ്ട്രീയ കൃഷി വികാസ് യോജന, പരമ്പരാഗത് കൃഷി വികാസ് യോജന, പ്രധാനമന്ത്രി ഗ്രാം സിഞ്ചായി യോജന, ഗോകുല് മിഷന് തുടങ്ങിയ പദ്ധതികളിലൂടെയാണ് ജൈവ കാര്ഷിക മേഖലയുടെ പ്രോത്സാഹനത്തിനായി കേന്ദ്ര സര്ക്കാര് ആവിഷ്കരിച്ചിരിക്കുന്നത്.
പരിസ്ഥിതി സൗഹൃദ കാര്ഷിക രീതി പ്രോത്സാഹിപ്പിക്കുക, തദ്ദേശീയമായി ലഭ്യമായ എല്ലാ പ്രകൃതി വിഭവങ്ങളും ഉപയോഗപ്പെടുത്തുക, പരമ്പരാഗത കൃഷി രീതി പ്രോത്സാഹിപ്പിക്കുക, 50 ഏക്കര് വീതമുള്ള 10,000 ക്ലസ്റ്ററുകള് രൂപീകരിക്കുക, ജൈവ ഉത്പ്പന്നങ്ങള്ക്ക് മെച്ചപ്പെട്ട വിപണി കണ്ടെത്തുക തുടങ്ങിയവയാണ് കേന്ദ്ര സര്ക്കാരിന്റെ മുന്ഗണനാ ലിസ്റ്റില് ഉള്ളത്. അടുത്ത മൂന്നു വര്ഷത്തിനുള്ളില് അഞ്ച് ലക്ഷം ഏക്കര് സ്ഥലം ഇത്തരത്തില് കൃഷി യോഗ്യമാക്കുക എന്നതാണ് ലക്ഷ്യം. ഇതിനായി കര്ഷകര്ക്ക് ക്ലസ്റ്ററിന് 20,000 രൂപ വീതം നല്കുമെന്നും അജയ് രജപുത് പറഞ്ഞു.
പരമ്പരാഗത കൃഷി വികാസ് യോജനക്ക് മാത്രം നടപ്പ് സാമ്പത്തിക വര്ഷം 300 കോടി രൂപ അനുവദിച്ചിട്ടുണ്ട്. 6208 ക്ലസ്റ്ററുകള്ക്ക് അംഗീകാരം നല്കിയിട്ടുണ്ടെന്നും അദ്ദേഹം അറിയിച്ചു. കഴിഞ്ഞ മാസം വരെയുള്ള കണക്കനുസരിച്ച് കേരളത്തില് 119 ക്ലസ്റ്ററുകള്ക്കായി 318.52 ലക്ഷം രൂപയാണ് അനുവദിച്ചിട്ടുള്ളത്. 849 ലക്ഷം രൂപയാണ് കേരളത്തിന്റെ ആകെ വിഹിതം.
