എരുമേലി: ശബരിമല തീര്ത്ഥാടനത്തിന്റെ ശരണമന്ത്രം മുഴക്കി ശബരീശന്റെ പുണ്യം നുകരാന് കാല്നടയായി ആദ്യ ഹൈദ്രാബാദ് സംഘം എരുമേലിയിലെത്തി. രണ്ടുമാസത്തെ കഠിനവ്രതത്തോടുകൂടി ആയിരത്തോളം കിലോമീറ്ററുകള് നഗ്നപാദരായി സഞ്ചരിച്ചാണ് സംഘം കഴിഞ്ഞ ദിവസം ഉച്ചയോടെ എരുമേലി ശ്രീധര്മ്മ ശാസ്താ ക്ഷേത്രത്തിലെത്തിയത്.
കഴിഞ്ഞ ഒന്പത് വര്ഷമായി രാജാഗുരുസ്വാമിയുടെ നേതൃത്വത്തില് 13 പേരടങ്ങുന്ന സംഘം വിവിധ സംസ്ഥാനങ്ങളിലെ പല പ്രമുഖ ക്ഷേത്രങ്ങളും സന്ദര്ശിച്ചാണ് എത്തിയത്. സ്വദേശത്തെ സാധാരണ ജോലിക്കാരായ തീര്ത്ഥാടക സംഘത്തിന് മറ്റൊരു സ്വാമിയുടെ വഴിപാടായാണ് ഇത്തവണത്തെ തീര്ത്ഥയാത്രയെന്നും ക്ഷേത്രത്തിലെ പൂജാരികൂടിയായ ഗുരുസ്വാമി പറഞ്ഞു.
അയ്യപ്പസ്വാമിയുടെ അനുഗ്രഹം യാത്രയിലുടനീളം ദര്ശിക്കാനായെന്നും ഈ തീര്ത്ഥാടനത്തിലൂടെ അനുഭവിക്കുന്ന ഈശ്വരഭക്തി മോക്ഷമാര്ഗ്ഗമായിത്തീരുമെന്നും ഗുരുസ്വാമി പറഞ്ഞു. ഭക്ഷണം സ്വയം പാകം ചെയ്തും ക്ഷേത്രസങ്കേതങ്ങളില് വിശ്രമിച്ചും ഉറങ്ങിയും നടത്തുന്ന പുണ്യയാത്രയുടെ മോക്ഷം തന്റെ നാട്ടിലുള്ളവര്ക്കും ലഭിക്കുമെന്നും ഗുരുസ്വാമി ജന്മഭൂമിയോട് പറഞ്ഞു.
